Qazaxıstanın Astana şəhərində yerləşən "Nazarbayev University" (NU) nüfuzlu "Times Higher Education World University Rankings 2027" reytinqində təmsil olunan MDB ölkələrinin universitetləri arasında ilk dəfə birinci yeri tutub. Bu, azərbaycanlı tələbələrə beynəlxalq akademik standartlara uyğun ingilisdilli təhsil almaq, müasir tədqiqat avadanlıqlarından istifadə etmək və maliyyə dəstəyi proqramlarından yararlanmaq imkanı verir.
"Nazarbayev University"nin məlumatına görə, məzunların məşğulluq səviyyəsi 95 faizi ötür. Onlar həm Qazaxıstanda, həm də xarici ölkələrdə, o cümlədən "Google", "Microsoft", "Amazon" və "Meta" kimi beynəlxalq şirkətlərdə, eləcə də digər aparıcı şirkətlərdə iş tapırlar. Elmi tədqiqatlarda iştirak təcrübəsi, beynəlxalq akademik mühitdə təhsil və şəxsi layihələrini inkişaf etdirmək imkanı məzunların əmək bazarında rəqabət qabiliyyətini artırır. Məzunların bir qismi təhsillərini xaricdə davam etdirir. NU məzunları "Ayvi Liqası" universitetlərinə, eləcə də "Stanford University", "Massachusetts Institute of Technology" (MIT), "University of Oxford" və dünyanın digər aparıcı ali təhsil müəssisələrinə təqaüd hesabına qəbul olunurlar.
NU-da tələbələr və məzunlar yalnız bilik əldə edib elmi fəaliyyətlə məşğul olmur, həm də öz texnoloji layihələrini inkişaf etdirə bilirlər. Universitetin ekosistemi sahibkarlıq təşəbbüslərini dəstəkləyir və komandalara beynəlxalq səviyyəyə çıxmağa kömək edir.
Artıq NU ilə əlaqəli 18 startap "Stanford University" icmasının iştirakı ilə yaradılmış "StartX" akselerasiya proqramından keçib. Texnologiya komandaları üçün bu, ideyalarını inkişaf etdirmək və beynəlxalq sahibkarlıq mühitində iş təcrübəsi qazanmaq imkanıdır.
Bunun nümunələrindən biri bazar dəyəri 5.4 milyard ABŞ dolları olan, Qazaxıstanın ilk texnoloji "unikornu" "Higgsfield AI" şirkətidir. Universitetin məlumatına görə, startap komandasının 90 faizini NU-nun məzunları və tələbələri təşkil edir.
"Nazarbayev University" məzunlarına yüksək tələbatın yaranmasına universitetin reytinqlərdəki mövqeyi də təsir göstərir.
Cəmi bir il əvvəl "Nazarbayev University" MDB universitetləri arasında dördüncü yerdə idi. "THE World University Rankings 2027" reytinqində universitet reytinqə daxil edilmiş birlik ölkələrinin ali təhsil müəssisələri arasında ilk pilləyə yüksəlib, Qazaxıstan, Mərkəzi Asiya və Qafqaz üzrə liderliyini qoruyub.
Dünyanın ən yaxşı tədqiqat universitetlərinin yenilənmiş reytinqində NU 376-400-cü yerlər intervalında qərarlaşıb və iki reytinq dövrü ərzində mövqeyini 200 pillə yaxşılaşdırıb. Universitet regionun bir sıra aparıcı ali təhsil müəssisələrini, o cümlədən Moskva Fizika-Texnika İnstitutunu (401-450), N.E.Bauman adına Moskva Dövlət Texniki Universitetini (551-600) və Milli Tədqiqat Universiteti "Ali İqtisad Məktəbi"ni (601-650) qabaqlayıb. NU reytinqdə Azərbaycan universitetlərini də geridə qoyub: Azərbaycan Dövlət İqtisad Universiteti (701-800), Bakı Dövlət Universiteti (1601-1800) və Azərbaycan Dövlət Neft və Sənaye Universiteti (1801-2000).
Bu il reytinqdə MDB ölkələrinin təmsilçiliyi genişlənib: birlik ölkələrinin rekord sayda - 97 universiteti reytinqə daxil edilib. Qazaxıstan universitetlərinin sayı beşdən ona yüksəlib. Azərbaycan isə beş universitetlə təmsil olunub.
"Nazarbayev University"nin inkişafının əsas istiqamətlərindən biri müasir təhsil proqramlarının elmi tədqiqatlar və beynəlxalq əməkdaşlıqla uzlaşdırılmasıdır. Universitet Böyük Britaniya, Sinqapur, Çin və Honkonq ali təhsil müəssisələri ilə, o cümlədən "King's College London", "University of Bath", "National University of Singapore" (NUS) və "Tsinghua University" ilə akademik əlaqələrini inkişaf etdirir.
Bu əməkdaşlıq ikili diplom proqramlarını, akademik mübadiləni və tədqiqat layihələrində iştirakı əhatə edir.
NU-nun Böyük Britaniyanın "SOAS University of London" universiteti ilə ilk birgə proqramı "MA in Global Affairs and Eurasian Studies" magistr proqramı olub. Bu proqram beynəlxalq münasibətlər, diplomatiya, beynəlxalq təşkilatlar və ya tədqiqat mərkəzləri sahəsində karyera qurmağı planlaşdıranlar üçün uyğundur.
Təhsil London və Astanada keçirilir. Proqrama Mərkəzi Asiya və Qafqazın geosiyasəti, beynəlxalq təhlükəsizlik, energetika və qlobal siyasi proseslər daxildir.
Digər imkan Honkonqun "Hong Kong University of Science and Technology" (HKUST) universiteti ilə birgə həyata keçirilən "Business Administration in Eurasian Business" bakalavr proqramıdır. Tələbələr ilk iki ili Astanada, NU-da, növbəti iki ili isə Honkonqda, HKUST-də oxuyurlar.
Bu il NU-da Kompüter elmləri və süni intellekt məktəbi (School of Computing and Artificial Intelligence, SCAI) fəaliyyətə başlayıb. Universitetin təklif etdiyi yeni istiqamətlərə "Hong Kong Polytechnic University" (The Hong Kong Polytechnic University, PolyU) ilə birgə həyata keçirilən süni intellekt üzrə bakalavr proqramı, fənlərarası "AI for X PhD" proqramı, eləcə də kibertəhlükəsizlik üzrə magistr proqramı daxildir.
NU Çinin aparıcı ali təhsil müəssisələrindən biri olan "Tsinghua University" ilə də əməkdaşlıq edir. Hər iki universitet Asiyanın aparıcı universitetlərini birləşdirən, akademik əməkdaşlığı və bilik mübadiləsini inkişaf etdirən, regional və qlobal məsələlərin həlli istiqamətində birgə fəaliyyəti təşviq edən "Asian Universities Alliance" (AUA) alyansının üzvüdür.
"Nazarbayev University"nin kampusu müasir tədris korpuslarını, tədqiqat laboratoriyalarını, kitabxananı, idman obyektlərini və tələbə yataqxanalarını bir araya gətirir. Bu məkan tələbələrə təhsili elmi fəaliyyət, idman, şəxsi təşəbbüslərin inkişafı və universitet həyatında iştirakla uzlaşdırmağa imkan verir.
Universitet xarici ölkələrdən, o cümlədən Azərbaycandan olan abituriyentlər üçün müxtəlif maliyyə dəstəyi formaları nəzərdə tutur. Onlardan biri xarici tələbələr üçün nəzərdə tutulmuş "Abay" proqramıdır.
Təhsil proqramları, qəbul tələbləri, mövcud təqaüdlər və sənədlərin təqdim edilməsi qaydası haqqında ətraflı məlumatı "Nazarbayev University"nin rəsmi resurslarından əldə etmək mümkündür.
2027-2028-ci tədris ili üçün ərizə qəbulu 12 oktyabr 2026-cı il tarixində başlayıb.
* M.V.Lomonosov adına Moskva Dövlət Universiteti (MDU) "Times Higher Education World University Rankings 2027" reytinqində təmsil olunmayıb.
