2010-cu il avqustun 5-də Çilinin Atakama səhrasındakı San-Xose mis və qızıl mədənində baş verən güclü uçqun nəticəsində 33 mədənçi yerin təxminən 700 metr dərinliyində köməksiz qaldı.
Baku TV-nin məlumatına görə, təxminən 800 min tonluq qaya kütləsi şaxtanın çıxışını bağladı, mədənçilər isə elektrik, rabitə və havalandırma imkanlarından məhrum oldular.
Növbə rəisi Luis Ursuanın rəhbərliyi və Mario Sepulvedanın ruh yüksəkliyi sayəsində şaxtaçılar cəmi 48 saatlıq qida ehtiyatını bölüşdürərək sağ qalmağa çalışdılar. Qəzanın 17-ci günündə axtarış zondlarından biri onların sığınacağına çatdı. Mədənçilər zond vasitəsilə göndərdikləri məktubda "Sığınacaqda 33 nəfərik və hamımız sağ-salamatıq" yazdılar.
Çili prezidenti və dağ-mədən nazirinin nəzarəti altında, NASA mütəxəssislərinin də iştirak etdiyi genişmiqyaslı xilasetmə əməliyyatına başlanıldı. Çətinliklərə baxmayaraq, 65-ci gündə - oktyabrın 9-da qazma işləri şaxtaçıların sığınacağına çatdı.
Oktyabrın 12-dən 13-nə keçən gecə xüsusi "Fenix" kapsulu vasitəsilə xilasetmə əməliyyatına start verildi. İlk olaraq Florensio Avalos yerin üzünə çıxarıldı. Təxminən 22 saat davam edən və 22 milyon dollara başa gələn əməliyyat nəticəsində 33 şaxtaçının hamısı sağ-salamat xilas edilərək ailələrinə qovuşdu.
Yaşadıqları dəhşətli günlər barədə danışmamaq üçün razılığa gələn şaxtaçıların hekayəsi 2015-ci ildə Antonio Banderasın baş rolda çəkildiyi "33" filmində ekranlaşdırıldı.