Çili hakimiyyəti hantavirusdan ölüm hallarının artması fonunda ölkə ərazisində sanitar-epidemioloji həyəcan rejimi elan edib.
Oxu.Az TASS-a istinadən xəbər verir ki, bu barədə Çili Səhiyyə Nazirliyi məlumat yayıb.
"Səhiyyə Nazirliyi ilk dəfə olaraq hantavirusla əlaqədar sanitar həyəcan rejimi elan edib. Bu tədbir Atakama bölgəsindən Maqalyanesədək bütün əraziləri əhatə edir və 31 iyul 2027-ci il tarixinədək qüvvədə olacaq", - deyə nazirliyin bəyanatında bildirilir.
Məlumata görə, bu ilin əvvəlindən ötən həftəyədək ölkədə 46 hantavirusa yoluxma halı qeydə alınıb, onlardan 18-i ölümlə nəticələnib. Müqayisə üçün, 2025-ci ildə Çilidə 44 yoluxma və 8 ölüm faktı qeydə alınmışdı.
Çilinin səhiyyə nazirinin müavini Aleksandra Pisarro bildirib ki, bu il ölüm göstəricisinin artması ciddi narahatlıq doğurduğu üçün sanitar həyəcan rejiminin elan edilməsi qərara alınıb.
Eyni zamanda nazirlik vurğulayıb ki, sanitar həyəcan rejiminin tətbiqi ölkədə hantavirus epidemiyasının baş verməsi və ya səhiyyə sisteminin həddindən artıq yüklənməsi anlamına gəlmir.
Hantaviruslar əsasən kiçik məməlilərdə rast gəlinən viruslar ailəsinə aiddir. Virus insanlara da keçə bilər və ağır hallarda ağciyərlərin zədələnməsi, ürək çatışmazlığı, eləcə də hemorragik qızdırma kimi ciddi fəsadlara səbəb ola bilər.
