ABŞ-də "Halloween" bayramının qeyd edilməsi çoxsaylı silahlı insidentlərlə müşayiət olunub.
Oxu.Az "RİA Novosti"yə istinadən xəbər verir ki, cümə günündən bazar gününədək 201 nəfər odlu silahdan yaralanıb, azı 76 nəfər isə həyatını itirib.
Ən ağır faciələrdən biri Texas ştatının Dallas şəhərində qeydə alınıb. Burada bir gecə ərzində üç atışma baş verib. Dörd nəfər ölüb, daha 15 nəfər yaralanıb. Hüquq-mühafizə orqanları bu hücumların bir-biri ilə əlaqəli olub-olmadığını araşdırır.
Kaliforniyanın Ferfild şəhərindəki ticarət mərkəzində, "Halloween" geyimləri satılan mağazanın yaxınlığında silahlı hücum olub. Nəticədə 31 yaşlı hamilə qadın dünyasını dəyişib, altı nəfər isə müxtəlif dərəcəli xəsarətlər alıb. İlkin ehtimallara görə, bu, əvvəlcədən planlaşdırılmış hücum olub.
Florida ştatının Ceksonvill şəhərində baş verən iki ayrı insident zamanı 17 yaşlı qız və 20 yaşlı gənc həyatını itirib, 11 nəfər isə yaralanıb.
İllinoysda 19 yaşlı qız atışmanın qurbanı olub, Montana ştatında isə silahlı qarşıdurma zamanı şerif müavini öldürülüb.
Silahlı insidentlərin qeydə alındığı digər ərazilər arasında Delaver, Kanzas, Çikaqo və Alabama da var. Zərərçəkənlər arasında yeniyetmələr də mövcuddur.
Baş verən hadisələrin heç də hamısı birbaşa "Halloween" bayramı ilə əlaqəli deyil: statistikaya məişət zəminində yaranan münaqişələr və odlu silahdan istifadə edilən digər hallar da daxil olunub.
Hazırda polis tərəfindən araşdırmalar davam etdirilir.
