Türkiyənin Afyonkarahisar vilayətində səkkiz nəfəri öldürməkdə şübhəli bilinən 28 yaşlı Arif Sefa Özdemirin qaçış planı ilə bağlı yeni detallar məlum olub.
Bu barədə Oxu.Az "Haber Global"a istinadən xəbər verir.
Məlumata görə, polisdən gizlənməyə çalışan şəxs özünü Türkiyə Milli Kəşfiyyat Təşkilatının (MİT) əməkdaşı kimi təqdim edərək yerli sakinlərin avtomobillərini zorla əllərindən alıb.
Türkiyə mətbuatı bildirir ki, Özdemir İhsaniye rayonunun Bozüyük kəndində yaşayıb, kənd təsərrüfatı ilə məşğul olub və bir uşaq atasıdır. O, təxminən iki il əvvəl həyat yoldaşından boşanıb. Şübhəlinin bu qətliamı hansı səbəbdən törətdiyi hələlik müəyyənləşdirilməyib.
O, hücumlardan sonra Əskişəhər vilayəti istiqamətində hərəkət edib, Seyitgazi rayonundakı Çatören bəndi yaxınlığında içərisində 19 yaşlı Talha Gökgöz və dostunun olduğu avtomobili saxladıb. Özünü təhlükəsizlik orqanı agenti kimi təqdim edən Özdemir maşında narkotik maddə yoxlaması aparmaq tələbi irəli sürüb, gənclərin telefonlarını alıb, daha sonra isə tüfəng çıxararaq onları hədələməyə başlayıb.
Gökgöz baş verənləri belə nəql edib:
"O, tüfəngi dostuma tərəf tuşladı. Bizi öldürəcəyindən qorxduğum üçün maşının açarlarını ona verdim".
Onun sözlərinə görə, bundan sonra onlar şübhəlinin dərəyə atdığı telefonları götürərək polisə zəng ediblər. Qaçırılan avtomobil qısa müddət sonra palçığa batıb və Özdemir qaçışına piyada davam edib, daha sonra başqa bir avtomobili də ələ keçirib.
Məlumata görə, yerli çoban onu görəndə şübhəli şəxs "Fənəri yandırma, mən buralıyam" deyərək kimliyini gizlətməyə cəhd edib. Çox keçmədən şübhəli Əskişəhər - Afyonkarahisar avtomobil yolunda saxlanılıb.
Əməliyyatın gedişatında iki jandarm əməkdaşı yaralanıb.
Xatırladaq ki, noyabrın 5-də Afyonkarahisar vilayətinin üç yaşayış məntəqəsində silahlı hücumlar qeydə alınıb. Ov tüfəngindən açılan atəş nəticəsində səkkiz nəfər həyatını itirib, daha bir qadın isə ağır yaralanıb. Ölənlər arasında iki müəllimə də olub.
