ABŞ-nin Kaliforniya ştatının Beykersfild şəhərindəki banklardan birində bir neçə nəfəri girov götürən şəxs zərərsizləşdirilib.
Oxu.Az xəbər verir ki, bu barədə şəhər polisi "X" sosial şəbəkəsində məlumat yayıb.
Bildirilir ki, insident FTB əməkdaşlarının iştirakı ilə baş verən atışmadan sonra başa çatıb. Hüquq-mühafizə orqanlarının müdaxiləsi nəticəsində şübhəli şəxs hadisə yerində ölüb.
Rəsmi məlumata görə, girov saxlanılan şəxslərdən heç biri xəsarət almayıb.
Kaliforniyanın Beykersfild şəhərində naməlum şəxs "Chase" bankına daxil olaraq bir neçə nəfəri girov götürüb.
Oxu.Az xəbər verir ki, bu barədə "The Washington Post" nəşri məlumat yayıb.
Xəbərə görə həmin şəxs binada barrikada qurub. Hüquq-mühafizə orqanlarının əməkdaşları binanı mühasirəyə alıblar. Hazırda içəridə ümumilikdə neçə nəfərin qaldığı dəqiq bilinmir.
Qeyd olunur ki, hadisə yerinə Federal Təhqiqatlar Bürosunun (FTB) əməkdaşları da cəlb olunublar.
Beykersfild şəhərinin meri Karen Qoh sakinləri şəhər mərkəzindən uzaq durmağa çağırıb. Xüsusi sərəncama qədər yollarda nəqliyyatın hərəkəti dayandırılıb.
