ABŞ vətəndaşı Tomas Veyr Pauken Birləşmiş Ştatlar ərazisində xarici hökumətin agenti kimi fəaliyyət göstərdiyini və Çin Xalq Respublikasının (ÇXR) xüsusi xidmət orqanlarının tapşırıqlarını yerinə yetirdiyini etiraf edib.
Oxu.Az xəbər verir ki, bu barədə ABŞ Ədliyyə Nazirliyinin məlumat yayıb.
Bildirilib ki, 50 yaşlı amerikalı təxminən 15 il Çində yaşayıb və jurnalistika ilə məşğul olub. O, Tomas Makqreqor təxəllüsü ilə müxtəlif Çin mətbuat orqanlarında məqalələr yazıb və televiziyada ekspert kimi çıxış edib. Federal Təhqiqatlar Bürosunun (FTB) məlumatına əsasən, o, ən azı 2019-cu ildən 2026-cı ilə qədər Çin xüsusi xidmət orqanlarının, eləcə də ÇXR Dövlət Təhlükəsizliyi Nazirliyinin müxtəlif tapşırıqlarını icra edib.
Onun kuratoru özünü Keyti kimi təqdim edən bir qadın olub. Məhz onun göstərişi ilə Pauken Çin kəşfiyyatının potensial cəlb etmə hədəfi kimi baxdığı şəxslərlə görüşlər keçirib. Bununla yanaşı, o, həmin şəxslərə Çin kəşfiyyatı ilə əlaqə saxlamaq üçün mobil telefonlar, noutbuklar və digər rabitə cihazları verərək, onlarla ÇXR xüsusi xidmət orqanları arasında vasitəçi rolunu oynayıb.
Bu fəaliyyətlərinə görə Pauken kuratorundan ən azı 100 min dollar məbləğində pul alıb. Əlavə olaraq, Keyti 2019-cu ildən 2025-ci ilə qədər potensial agentlərlə görüşmək üçün onun ABŞ-yə etdiyi bir neçə səfərin xərclərini qarşılayıb. Bu səfərlərdən birində FTB əməkdaşları tərəfindən dindirilən Pauken sonradan sərbəst buraxılıb. Lakin Çin kəşfiyyatının tapşırığı ilə həyata keçirdiyi növbəti səfərlərin birində o, həbs edilib. ABŞ qanunvericiliyinə görə, bu maddə üzrə nəzərdə tutulan maksimum cəza 10 il azadlıqdan məhrumetmədir. Paukenin işi üzrə məhkəmə prosesi sentyabrın 1-də keçiriləcək.
