Amerika Birləşmiş Ştatları İranla razılaşma memorandumunun müzakirələri zamanı nümayəndə heyətinin təcrübəsizliyi ucbatından daha zəif mövqedə qərarlaşıb.
Oxu.Az xəbər verir ki, bu barədə "Financial Times" (FT) qəzeti məlumat dərc edib.
Məlumata görə, ABŞ Prezidenti Donald Tramp xarici siyasət sövdələşmələrinin bağlanmasını region üzrə ekspertlərə deyil, öz etibar etdiyi şəxslərə həvalə etməyə üstünlük verir. Trampı tənqid edənlərin əksəriyyəti düşünür ki, təsdiqlənən razılaşma sənədi davamlı ola bilməzdi, çünki dövlət başçısı "mütəxəssisləri arxa plana keçirib".
"Bizi oyuna gətirdilər. İranlılar təcrübəli danışıqçıdırlar, onlar öz sahələrində 100% bilikli ekspert komandaları gətirdilər. ABŞ bunu etmədi və birtərəfli qaydada özünü daha əlverişsiz vəziyyətə saldı", - deyə Trampın ikinci prezidentlik müddətinin əvvəlində işdən çıxarılan ABŞ-nin İordaniyadakı keçmiş səfiri Yael Lempert bildirib.
Bundan başqa, əvvəllər İranın nüvə fəaliyyəti ilə bağlı müzakirələrə qatılmış Mərkəzi Kəşfiyyat İdarəsinin (MKİ) sabiq rəhbəri Uilyam Börns qəzetə verdiyi açıqlamada vurğulayıb:
"Belə bir vəziyyətdə, şəxsi təcrübəmə əsaslanaraq deyə bilərəm ki, bu mövzularda dərin bilgiyə sahib olan İran nümayəndələrinə qarşı rəqabətədavamlı qalmaq üçün xüsusilə apolitik peşəkarlıq tələb olunur".
