Avstraliya hakimiyyəti ABŞ-nin kimya şirkəti olan "3M Company"yə qarşı 28 hərbi bazanın yanğınsöndürmə vasitələrində istifadə olunan kimyəvi maddələrlə çirkləndirilməsi ilə əlaqədar məhkəməyə müraciət edib.
Oxu.Az xəbər verir ki, bu barədə ölkənin Baş prokuroru Mişel Roulendin mətbuat xidməti məlumat yayıb.
"Hökumət Avstraliya Federal Məhkəməsinə "3M Australia Pty Ltd" və "3M Company" şirkətlərinə qarşı ölkə üzrə 28 hərbi bazada perfluoroalkil və polifluoroalkil maddələri (PFAS) ilə çirklənmə nəticəsində dəymiş zərərin ödənilməsi tələbi ilə iddia qaldırıb", - məlumatda qeyd olunub.
Bildirilib ki, ABŞ şirkəti tərəfindən istehsal edilən kimyəvi maddələr əvvəllər Avstraliya silahlı qüvvələri tərəfindən yanğınsöndürmə köpüyündə istifadə edilib. Avstraliya müdafiə nazirinin müavini Piter Halilin sözlərinə görə, hakimiyyət şirkətdən 2 milyard Avstraliya dollarından çox (1,4 milyard ABŞ dollarından artıq) kompensasiya tələb edir. O əlavə edib ki, Müdafiə Nazirliyi artıq araşdırma, ərazinin kimyəvi maddələrdən təmizlənməsi və əhaliyə kompensasiya ödəmələri üçün 1,3 milyard Avstraliya dolları (925 milyon ABŞ dollarından çox) xərcləyib. Bundan başqa, şirkət çirklənmə və onun nəticələri barədə məlumatları gizlətməkdə ittiham olunur.
"3M Company"nin nümayəndəsi isə ittihamlara cavab olaraq bildirib ki, şirkət heç vaxt Avstraliyada "PFAS" istehsal etməyib və təxminən 20 il əvvəl onların ölkədə satışını dayandırıb. O, hərbi qüvvələri satışların dayandırılmasına baxmayaraq, "PFAS" tərkibli yanğınsöndürmə köpüyünü təxminən iki onillik daha çox istifadə etməkdə günahlandırıb.
