İqlim dəyişikliyi Latın Amerikasında və Karib hövzəsində banan istehsalına mənfi təsir göstərir.
Oxu.Az xəbər verir ki, Ekseter Universitetinin alimləri apardıqları araşdırmadan sonra bu qənaətə gəliblər ki, dünyanın ən populyar və vacib kənd təsərrüfatı məhsullarından birinin istehsalı təhlükə altına düşüb. Onların tədqiqatlarının nəticələri "Nature Food" (NF) jurnalında dərc olunub.
Bildirilir ki, 2080-ci ilə qədər bananın hazırda yetişdirildiyi bölgələrin 60%-i iqtisadi cəhətdən əlverişsiz olacaq, bunun səbəbi iqlim dəyişikliyi nəticəsində temperaturun artmasıdır.
"Əsas ixrac məhsulu olub, hər il 11 milyard dollar gəlir gətirən banan bir çox ölkələrin iqtisadiyyatında mühüm rol oynayır. Adaptasiya üçün təxirəsalınmaz tədbirlər görülməzsə, milyonlarla işçi işini itirə bilər. Kolumbiya və Kosta-Rika kimi ölkələr ən çox zərər çəkənlər sırasında olacaq, çünki bu bölgələrdə temperatur bananın optimal şəkildə yetişdirilməsi üçün çox yüksək olacaq. Eyni zamanda, Ekvador və Braziliyanın bir hissəsi bu sahəni saxlamağa davam edəcək, çünki bu bölgələrdə iqlim dəyişikliyi daha az dağıdıcı olacaq".
Alimlər adaptasiya tədbirləri kimi aşağıdakıları təklif edirlər: suvarma infrastrukturunun inkişafı, isti və quraqlığa davamlı növlərin yaradılması və fermerlərə iqlim risklərini idarə etməkdə dəstək göstərilməsi.
Bildirilir ki, fəal addımlar atılmadığı təqdirdə, iqlim dəyişikliyinin nəticələri banan sənayesində qlobal böhrana səbəb ola bilər.
