Böyük Britaniyada təcili bağırsaq əməliyyatı zamanı kobud tibbi səhvə yol verən cərrahın həkimlik fəaliyyəti qadağan edilib.
Oxu.Az xəbər verir ki, bu barədə "Daily Mail" nəşri məlumat yayıb.
Məlumata görə, Böyük Britaniyanın Milli Səhiyyə Xidmətində (NHS) çalışan cərrah Yasir Adli Əbdül Rəhman 2020-ci ilin avqustunda keçirdiyi əməliyyat zamanı xəstənin nazik bağırsağının yanlış hissəsini mədə ilə birləşdirərək həyat üçün ciddi təhlükə yaradan vəziyyətə səbəb olub.
Əməliyyatdan sonra xəstə güclü qusma və şiddətlənən ağrılardan əziyyət çəksə də, həkim onun yaxınlarına əməliyyatın uğurla başa çatdığını bildirib.
Daha sonra başqa bir cərrah tərəfindən təkrar əməliyyat aparılıb, buraxılmış səhv aradan qaldırılıb və xəstənin həyatı xilas edilib.
Məhkəmə iclasında iştirak etməyən Yasir Adli Əbdül Rəhman özünü təqsirli bilmədiyini bildirib.
Araşdırma zamanı onun daha əvvəl tətbiq edilmiş peşə məhdudiyyətini pozaraq 2022-ci ildə İrlandiyada da həkim kimi fəaliyyət göstərdiyi müəyyən edilib.
Nəticədə cərrahın adı tibbi reyestrdən çıxarılıb və ona həkimlik fəaliyyəti ilə məşğul olmaq qadağan edilib.
