Cənubi Koreya sərnişin təyyarələrini quşlardan qorumağın ÇARƏSİNİ TAPDI

Cənubi Koreya sərnişin təyyarələrinin quşlarla toqquşmasının qarşısını almaqdan ötrü tədbirlər görəcək.

Oxu.Az İHA agentliyinə istinadla xəbər verir ki, "Boeing 737" təyyarəsinin Cənubi Koreyanın Muan hava limanında quşlarla toqquşaraq qəzaya uğramasından sonra belə bir qərar alınıb.

Cənubi Koreyanın Ərazi, İnfrastruktur və Nəqliyyat Nazirliyi bu məqsədlə ölkə ərazisindəki bütün 15 hava limanında termal görüntüləmə kameraları və radar sistemləri quracaq. Hazırda ölkədə yalnız üç aeroportda bu cür kameralar və sistemlər mövcuddur.

Həmçinin "Incheon" və "Jeyu" hava limanlarında quşları qorxutmaq üçün səs və ultrasəs dalğalar yayan cihazların istifadəsi genişləndiriləcək. Təyyarələrə erkən xəbərdarlıq etmək üçün bütün aeroportlarda quş aşkarlayan radarlar quraşdırılacaq. Hava limanlarında quşlarla toqquşmaların qarşısının alınması üçün ayrılan şəxsi heyətin sayı artırılacaq.

Xatırladaq ki, 2024-cü il dekabrın 29-da Banqkokdan uçan "Jeju Air" aviaşirkətinin "Boeing 737" təyyarəsi Cənubi Koreyanın Muan hava limanında qəzaya uğraması nəticəsində 179 nəfər həlak olub. Eniş zamanı layner uçuş-eniş zolağından kənara çıxıb və beton hasara çırpılıb, daha sonra partlayıb. Hava gəmisi demək olar ki, tamamilə məhv olub. Qəzanın ilkin səbəbi kimi quşlarla toqquşma nəticəsində şassi sisteminin sıradan çıxması göstərilib.