Çinli cərrahlar tamamilə qopmuş hər iki ayağı uğurla bərpa etdilər.
Oxu.Az "Yangtse Evening Post"a istinadən xəbər verir ki, həkimlər bunu xəstənin yenidən yeriyə bildiyi dünyada təsdiqlənmiş ilk belə hal kimi qiymətləndiriblər.
51 yaşlı Cian adlı kişi 2024-cü il dekabrın 2-də Çinin Suçjou şəhərində istehsalat qəzası nəticəsində hər iki ayağını tamamilə itirib. O, Suçjou Ortopediya Xəstəxanasına çatdırılıb və həkimlər ayaqlarını bərpa etmək üçün əməliyyat keçirməyə qərar veriblər.
Təxminən səkkiz saat davam edən əməliyyat zamanı cərrahlar xəstənin öz ayaqlarından istifadə edərək sümükləri, qan damarlarını, sinirləri və digər zədələnmiş toxumaları bərpa ediblər.
Bərpa prosesi zamanı xəstədə toxuma nekrozu yaranıb və əlavə əməliyyatlara ehtiyac olub. Daha sonra sümüklərin bitişməsi ilə bağlı problemlər meydana çıxıb. Buna görə sümük transplantasiyası aparılıb və hər iki bud sümüyünün daxili fiksasiyası gücləndirilib.
Zədədən təxminən 20 ay sonra xəstə yenidən yeriyə bilir. Hazırda o, qoltuqağaclarından və digər yardımçı vasitələrdən istifadə etsə də, gündəlik işlərini müstəqil şəkildə yerinə yetirə bilir. Ayaqlarında hissiyyat da bərpa olunub.
Həkimlər gələcəkdə xəstənin dayaq vasitələrindən istifadə etmədən yeriyə biləcəyinə ümid edirlər.
