Çinəsilli milyarder Qo Venquy fırıldaqçılıq ittihamı əsasında ABŞ məhkəməsi tərəfindən 30 illik həbs cəzasına məhkum olunub.
Oxu.Az ABŞ mediasına istinadən xəbər verir ki, məhkəmə materiallarına görə, iş adamının 889 milyon dollar məbləğində aktivlərinin müsadirə edilməsi də nəzərdə tutulur.
İttiham tərəfinin bildirdiyinə görə, Qo maliyyəçisi ilə əlbir olaraq saxta məlumatlar təqdim etməklə yüz minlərlə istifadəçini fərqli şirkətlərə və proqramlara sərmayə qoymağa razı salıb. Bu yolla onlar yüz milyonlarla dollar vəsait əldə ediblər. Vurulan ziyanın ümumi həcmi bir milyard dolları ötür.
Bunlardan əlavə, Qo Venquy özünü Çin Kommunist Partiyasına rəqib kimi göstərərək ətrafına kütlə toplaya bilib. O, fəaliyyəti dövründə bir çox saxta adlardan yararlanıb. Təkcə rəsmi ittihamnamədə onun əsas adından başqa altı fərqli ləqəbi də yer alıb.
Nyu-Yorkdakı andlılar məhkəməsi 2024-cü ildə iş adamını çirkli pulların yuyulması, hədə-qorxu ilə tələb etmə və müxtəlif dələduzluq əməllərinə görə müqəssir hesab edib. Prokurorluq onun azı 30 il müddətinə azadlıqdan məhrum edilməsini istəmişdi.
Vətənində daşınmaz əmlak maqnatı və ən varlı şəxslərdən biri olan Qo, mənimsəmə və korrupsiya işi üzrə mühakimə olunmamaq üçün 2014-cü ildə Çini tərk edərək qaçıb. Birləşmiş Ştatlarda rəsmi dairələrə yaxın şəxslərlə əlaqələr quran biznesmen, həm də ABŞ-nin sabiq prezidenti Donald Trampın məsləhətçisi olmuş Stiv Bennonun biznes tərəfdaşı kimi tanınır. Xatırladaq ki, Bennon 2020-ci ildə Qonun şəxsi yaxtasında fırıldaqçılıq ittihamı ilə saxlanılaraq həbsə məhkum edilmişdi. Qo Venquy isə 2023-cü ildə Nyu-Yorkun Mərkəzi Parkı yaxınlığında yerləşən dəbdəbəli mənzilində ələ keçirilmişdi.
