Bakıda saxlanılan rusiyalı keçmiş hakim HƏBS EDİLDİ

Rusiyada axtarışda olan keçmiş məhkəmə hakimi Yelena Xaxalyeva Bakıda Heydər Əliyev Beynəlxalq Hava Limanında Daxili İşlər Nazirliyinin (DİN) Hava Nəqliyyatında Polis İdarəsinin əməkdaşları tərəfindən saxlanılıb.

Oxu.Az APA-ya istinadən xəbər verir ki, sabiq hakimin Bakıda ötən həftə saxlanıldığı bildirilir.

Onunla bağlı Xəzər Rayon Məhkəməsində prokurorluğun təqdimatına baxılıb.

Yanvarın 24-də Xəzər Rayon Məhkəməsində hakim Ramilə Xəzrinin sədrliyi ilə keçirilən prosesdə Yelena Xaxalyeva barəsində 40 gün müddətində həbs qətimkan tədbirinin seçilməsi ilə bağlı qərar çıxarılıb.

Həbs qətimkan tədbiri onun ekstradisiyası ilə bağlı hüquqi prosedurları həyata keçirmək məqsədi ilə seçilib.

Rusiya tərəfindən ekstradisiya ilə bağlı zəruri sənədlər təqdim olunandan sonra Bakı Ağır Cinayətlər Məhkəməsində Yelena Xaxalyevanın ekstradisiyası məsələsinə baxılacaq.

13:12

Azərbaycanda saxlanılan Rusiyanın Krasnodar vilayət məhkəməsinin keçmiş hakimi Yelena Xaxaleva məhkəmənin qərarından sonra öz ölkəsinə ekstradisiya olunacaq.

Oxu.Az-ın xəbərinə görə, bu barədə "RİA Novosti" Azərbaycan hüquq-mühafizə orqanlarındakı mənbəyə istinadən məlumat verib.

Qeyd edək ki, Yelena Xaxaleva Bakıdan Dubaya getməyi planlaşdırarkən hava limanında saxlanılıb, pasport nəzarətindən keçdiyi zaman onun axtarışda olduğu məlum olub.

"O, Azərbaycan məhkəməsi müvafiq qərar verdikdən sonra Rusiyaya ekstradisiya olunacaq", - deyə mənbə bildirib.

Xatırladaq ki, Yelena Xaxaleva 2022-ci ildə külli miqdarda fırıldaqçılıqda və vəzifə saxtakarlığında şübhəli bilinərək beynəlxalq axtarışa verilib. Krasnodar vilayət məhkəməsinin rəyasət heyətinin üzvü və sədrin müavini olan qadın uzun müddət iş yerində olmamasına baxmayaraq, əməkhaqqı almaqda ittiham edilib.

Hakim 2017-ci ildə qızının toyundan video yayımladıqdan sonra "şöhrət qazanıb". İosif Kobzon, Nikolay Baskov, Valeri Meladze və Vera Brejnevanın iştirak etdiyi və külli miqdarda pul xərcləndiyi dəbdəbəli toy mərasimi müəyyən suallar doğurmuşdu. KİV-də dərc edilən xəbərlərdə toya 2 milyon dollara yaxın vəsaitin xərcləndiyi yazılmışdı.