Amerika Birləşmiş Ştatları Dünya Bankını iqlim maliyyələşməsi qaydasını ləğv etməyə məcbur edib.
Oxu.Az xəbər verir ki, bu barədə "Financial Times" qəzeti məlumat dərc edib.
Məlumata görə, bank maliyyələşdirməsinin 45%-ni iqlim dəyişikliyi layihələrinə ayırmaq hədəfini planından çıxarıb. Qərar səhmdarlar arasında bir neçə ay davam edən danışıqlardan sonra qəbul edilib.
Bildirilir ki, Avropa ölkələri və borc alan dövlətlərin bir hissəsi hədəfin saxlanılmasının tərəfdarı olsa da, ən böyük səs payına və faktiki veto hüququna malik ABŞ onun ləğvinə nail olub.
Eyni zamanda, təşkilatın iqlim dəyişikliyinə qarşı mübarizəni nəzərdə tutan əsas proqramının müddəti uzadılıb. Sənəddən sadəcə iqlim layihələrinin maliyyələşdirilməsi ilə bağlı rəqəmsal öhdəlik çıxarılıb.
Həmçinin nəşr qeyd edir ki, ABŞ Prezidenti Donald Trampın administrasiyası ardıcıl olaraq iqlim gündəliyinə qarşı çıxır. Aprel ayında ABŞ-nin maliyyə naziri Skott Bessent bəyan etmişdi ki, bu cür hədəflər Dünya Bankının işinin effektivliyini azaldır və onu əsas missiyasından yayındırır.
