2026-cı ilin iyulunda dünya okeanının temperaturu bütün müşahidələr tarixində ən yüksək səviyyəyə çatıb.
Oxu.Az xəbər verir ki, bu barədə "The Guardian" Avropanın "Kopernik" İqlim Dəyişikliyi Xidmətinin məlumatlarına istinadən məlumat yayıb.
Bildirilib ki, qütb bölgələri istisna olmaqla, dəniz səthinin orta temperaturu 20.96°C təşkil edib. Müqayisə üçün qeyd edək ki, 2023-cü ilin iyulunda bu göstərici 20.89°C olub.
Xüsusilə Atlantik okeanının sahillərində və Aralıq dənizinin qərb hissəsində suyun temperaturunun kəskin yüksəldiyi, güclü dəniz istilik dalğalarının müşahidə olunduğu bildirilib.
Bununla yanaşı, 2026-cı ilin iyulunda qlobal yerüstü hava temperaturu 2024-cü ilin eyni ayı ilə müqayisədə cəmi 0.01°C aşağı olub. Bu cüzi fərqə görə alimlər hər iki ayı müşahidələr tarixində ən isti ikinci iyul kimi qiymətləndirirlər.
İsti və quraq hava şəraiti quruda da rekord göstəricilərə səbəb olub. Qərbi Avropada iyun və iyul ayları arasındakı dövr tarixdə ən isti dövr kimi qeydə alınıb. Bölgədə orta temperatur normadan 2.79°C yüksək olaraq 21.62°C təşkil edib.
Bu vəziyyət Aralıq dənizi hövzəsində genişmiqyaslı meşə yanğınlarına, həmçinin Sena, Reyn və Dunay çaylarında su səviyyəsinin azalmasına səbəb olan güclü quraqlığa gətirib çıxarıb.
Tədqiqatçılar bu istilik anomaliyalarını iqlim dəyişikliyi ilə əlaqələndirirlər. Onların fikrincə, "El-Ninyo" təbiət hadisəsinin təsiri ilə temperaturun gələcəkdə daha da yüksəlməsi mümkündür.
