Ermənipərəst senator Xarici Əlaqələr Komitəsinin sədri vəzifəsindən istefa verdi - YENİLƏNİB

Robert Menendes Amerika hüquq-mühafizə orqanları tərəfindən ona qarşı irəli sürülən korrupsiya ittihamları ilə əlaqədar ABŞ Senatının Xarici Əlaqələr Komitəsinin sədri vəzifəsindən müvəqqəti olaraq istefa verib.

Bu barədə ABŞ Konqresinin yuxarı palatasının demokrat çoxluğunun rəhbəri Çak Şumer məlumat verib.

Qeyd edək ki, ermənipərəst senator son 10 ildə ikinci dəfə korrupsiyada ittiham edilib. Senatın Tarix Bürosunun məlumatına görə, 69 yaşlı Menendes “ABŞ tarixində iki dəfə cinayətdə ittiham olunan ilk senator” kimi qeydə alınıb.

Mənbə: Haber Global

20:08

Nyu-Yorkun Cənub Dairəsinin prokurorluğu ABŞ Senatının Xarici Əlaqələr Komitəsinin rəhbəri Robert Menendesə qarşı korrupsiya ittihamı irəli sürüb.

Prokurorluğun məlumatına görə, Menendes və arvadı “üç nyucersili iş adamı ilə korrupsiya münasibətlərində olublar” və “yüz minlərlə dollar rüşvət” alıblar. Senator rüşvət kimi nağd pul, qızıl külçələr, lüks avtomobillər və digər qiymətli əşyaları qəbul edib.

Menendesin həssas hökumət məlumatlarını Misirə təqdim etdiyi və bu ölkənin xeyrinə ABŞ kənd təsərrüfatı nazirliyi rəsmilərinə təzyiq etdiyi bildirilir.

18:00

Qatı ermənipərəst mövqeyi ilə seçilən ABŞ senatoru Bob Menendesə qarşı bu gün rəsmi korrupsiya ittihamı irəli sürüləcək.

Bununla bağlı ABŞ prokurorunun “X” hesabında bildiriş qeyd olunub.

Məlumata görə, axtarışlar zamanı ondan və erməniəsilli həyat yoldaşından 500 min dollardan çox pul, qızıl külçələr, lüks avtomobillər və mebel götürülüb.

İddianamədə ABŞ senatorunun Misirə “gizli hökumət məlumatları” təqdim etməsi və başqa yollarla kömək göstərməsi bildirilir.