Pilotsuz uçuş aparatlarının (PUA) Estoniyanın hava məkanını pozması səbəbindən ölkədə NATO qırıcıları havaya qaldırılıb.
Oxu.Az xəbər verir ki, bu məlumatı respublikanın Xarici İşlər Nazirliyinin rəhbəri Marqus Tsaxna açıqlayıb.
Nazirin bildirdiyinə görə, hadisə zamanı ölkənin bir sıra ərazilərində hava həyəcanı siqnalları işə düşüb. Şimali Atlantika Alyansına məxsus qırıcılar Emari aviabazasından havaya qalxıb. XİN rəhbəri belə halları Rusiyanın Ukraynada apardığı hərbi əməliyyatların fəsadı adlandırıb.
O, "X" sosial platformasında qeyd edib:
"Bunlar aqressiyaya son qoymaq məqsədilə Rusiyaya göstərilən təzyiqin artırılması zərurətini önə çəkir".
Hazırda Baltik dənizi regionundakı NATO ölkələri PUA təhlükələrinə qarşı mübarizə məqsədilə ortaq əməliyyat qrupunun yaradılmasını planlaşdırır. Almaniyanın daxili işlər naziri Aleksandr Dobrindt avqust ayının sonlarında belə bir hazırlığın getdiyini artıq elan etmişdi.
