Fransa şərab oğurluğunda ittiham olunan diplomatı Nigeriyaya səfir təyin edib

Fransa daha əvvəl şərab oğurluğunda ittiham olunan diplomat Mark Fonbostyeni Nigeriyaya səfir təyin edib. 2010-cu ildə ona qarşı ittihamlar irəli sürüldükdən sonra, o, Fransanın Honq-Konqdakı baş konsulu vəzifəsindən istefa verməyə məcbur olub.

Oxu.Az xəbər verir ki, bu barədə "African Stream" portalı məlumat yayıb.

Məlumata görə, bu təyinat Parisin Qərbi Afrikada, xüsusilə Sahel bölgəsində ağır məğlubiyyətlərdən sonra öz təsirini saxlamaq planları ilə bağlı ola bilər. Bununla belə, Fonbostyenin keçmişi suallar doğurur ki, bu da oğurluqla yanaşı, Benində bir jurnalistə qarşı qarayaxma kampaniyasını da əhatə edir, nəticədə jurnalist həbsxanaya düşüb.

Qeyd olunur ki, son vaxtlar Fransa Mali, Burkina Faso və Nigerin fransız qoşunlarını ərazilərindən çıxmağa məcbur etdiyi və Parisin diplomatik nümayəndəliklərini bağladığı Sahel bölgəsində bəzi problemlərlə üzləşib. Bu, Fransanın maraqlarına ağır zərbə vurub, məsələn, uran kimi qiymətli resurslara çıxışın itirilməsinə səbəb olub.

2010-cu ildə Fonbostye Honq-Konqdakı bir qolf klubun restoranından dəyəri dörd min dollardan çox olan iki şüşə şərab oğurlamaqda ittiham olunurdu.