Fransada tibb işçiləri tərəfindən ölüm diaqnozu qoyulan 62 yaşlı xəstə üç saatdan sonra yenidən həyat əlamətləri göstərib.
Oxu.Az xəbər verir ki, bu qeyri-adi hadisə barədə BFMTV telekanalı xəbər verib.
Kanalın məlumatına əsasən, Bretan bölgəsində yaşayan Didye adlı şəxs Renn Universitet Xəstəxanasında ürək çatışmazlığı diaqnozu ilə müalicə alıb. Tibbi personalın təxminən 40 dəqiqəlik davamlı reanimasiya tədbirləri nəticə verməyib. Nəticədə xəstənin vəfat etdiyi rəsmiləşdirilib və bu barədə onun yaxınlarına məlumat verilib.
Lakin hadisədən üç saat keçdikdən sonra klinika işçiləri kişinin nəbzinin yenidən vurduğunu aşkar ediblər. Dərhal reanimasiya şöbəsinə yerləşdirilən pasiyentin bir neçə günlük müalicədən sonra səhhəti normallaşıb. Özünə gələn şəxsdə hərəkət qabiliyyəti və ya nitqin hər hansı ciddi pozuntusu qeydə alınmayıb.
Pasiyent baş verənləri "böyük bir şans" adlandırıb. Mütəxəssislər isə bu vəziyyətin, reanimasiya müdaxiləsi dayandırıldıqdan sonra ürək fəaliyyətinin öz-özünə bərpa olunduğu "Lazar fenomeni" ola biləcəyini istisna etmirlər.
