"Rockstar Games" şirkəti "Grand Theft Auto VI" ("GTA VI") oyununun təxminən 1 dəqiqə 30 saniyəlik yeni təqdimat treylerini yayımlayıb.
Oxu.Az xəbər verir ki, video şirkətin "YouTube" kanalında paylaşılıb.
Treylerdə oyunun baş qəhrəmanları Ceyson Düval və Lüsiya Kaminosun hekayəsi, eləcə də uydurma Leonida ştatındakı kriminal həyatın yeni detalları əks olunub. Kadrlarda Ceysonun hərbi keçmişi və həbsxanadan ona zəng edən Lüsiya göstərilir.
Süjetə görə, uğursuz qarətdən sonra qəhrəmanlar böyük bir kriminal sui-qəsdin içinə sürüklənirlər. Təhlükəli vəziyyətdən çıxmaq üçün onlar bir-birlərinə güvənməli olacaqlar.
Treylerdə avtomobillər, motosikletlər, təyyarələr, helikopterlər, polis təqibləri, silahlı qarşıdurmalar və Vays-Sitinin gecə həyatı da yer alıb. Ceysonun dəyişmiş saç düzümü də diqqət çəkib. Bu detal oyunda personajların saçlarının oyun prosesi zamanı uzana biləcəyi ehtimalını gündəmə gətirib.
Treylerin musiqi müşayiətində elektron musiqi dueti "Justice"in yeni kompozisiyasından istifadə olunub.
"Grand Theft Auto VI" oyununun 19 noyabr 2026-cı ildə "PlayStation 5" və "Xbox Series X/S" konsolları üçün satışa çıxarılması planlaşdırılır.
