Hindistanda pələnglər beş gündə altıncı qadını parçalayıblar.
Oxu.Az-ın xəbərinə görə, bu barədə "Hindustan Times" nəşri yazıb.
Məlumata görə, növbəti hücum Maharaştra ştatının Çandrapur rayonunda baş verib. 54 yaşlı Kaçrabai Bharde əri Arun və rəfiqələri ilə birlikdə səhər tezdən Kərbədə kəndindən meşəyə yola düşüb. Bharde qara xurma ağacının yarpaqlarını yığarkən yırtıcı tərəfindən hücuma məruz qalıb. Onun qışqırtısını eşidən insanlar qorxu içində kömək üçün kəndə qaçıblar. Onlar qayıdanda pələng artıq Bhardeni parçalamış olub. Qadın beş gün ərzində Tadoba-Andhari qoruğunda pələnglərin altıncı qurbanı olub.
Bundan əvvəl Badurni kəndi yaxınlığında yırtıcı 30 yaşlı Bhuvaneşvai Bhendreni parçalayıb. Daha əvvəl isə meşədə Naqla kəndindən olan 65 yaşlı Nimal Şendenin qalıqları tapılıb. Həmçinin əvvəlki günlərdə pələng bir hücumla Mendhamal kəndindən üç qadını - 55 yaşlı Kantabai Çoudhari, onun 30 yaşlı gəlini Şubhanqi Çoudhari və 50 yaşlı Sarika Şendeni parçalayıb.
Səlahiyyətlilər insanlara hücum etməkdə şübhəli bilinən insanyeyən pələngi tutduqlarını bildirsələr də, görünür, hücumları ya bir neçə pələng həyata keçirib, ya da ələ keçirilən dişi pələngin silsilə hücumlara aidiyyəti olmayıb.
Qəzəbli yerli sakinlər bununla bağlı etiraz aksiyası keçiriblər. Kənd sakinlərinə yaxın vaxtlarda meşəyə gəzintilərdən çəkinmələri tövsiyə olunub.
