Yəmənin "Ənsar-Allah" üsyançı hərəkatından olan husilər İsrailin cənubundakı hərbi hədəflərə ballistik raketlərlə zərbələr endiriblər.
Oxu.Az-ın TASS-a istinadən xəbərinə görə, bu barədə radikalların yaratdığı silahlı qüvvələr bəyanat yayıb.
Üsyançılar bildiriblər ki, İrana və müttəfiqlərinə qarşı müharibə dayandırılana qədər öz hücumlarını davam etdirəcəklər.
İsrail və ABŞ koalisiyası ilə İran arasında müharibənin başlamasından bir ay sonra - martın 28-də səhər saatlarında Yəməndən olan husilər prosesə qoşulublar. Onlar İsrailin Negev bölgəsinə doğru raket atıblar.
Bu barədə Oxu.Az İsrail KİV-ə istinadən xəbər verir.
Məlumata görə, Yəməndən İsrail istiqamətində atılan raket Beer-Şeva ərazisində zərərsizləşdirilib.
İsrail Müdafiə Qüvvələri (IDF-SAXAL) öz "Telegram" kanalında Yəməndən İsrail ərazisinə raket atıldığını təsdiqləyib. Təhlükənin qarşısını almaq üçün hava hücumundan müdafiə sistemlərinin işə düşdüyü bildirilib.
Qeyd edək ki, husilər daha əvvəl İrana qarşı hücumlar davam edərsə, müharibəyə qoşula biləcəklərini bəyan etmişdilər.
