İranda illərdən bəri davam edən, xüsusən yay mövsümündə kəskinləşən su çatışmazlığı özünün pik həddinə çatıb. Ölkə rəsmiləri və mütəxəssislər su təminatında ciddi böhran vəziyyəti ilə bağlı açıqlamalar verir, mediada bununla bağlı həyəcanlı xəbərlər və təhlillər yayılır.
Bu barədə "Azad İran" "YouTube" kanalında yayımlanan yeni videosüjetdə qeyd olunur.
Müəllif qeyd edir ki, vətəndaşların gündəlik həyat və məişətində susuzluğun doğurduğu çətinliklər sosial şəbəkələrin əsas mövzularından birinə çevrilib:
"Rəsmi məlumata görə, hazırda İranın 50 şəhərində və 24 əyalətində kəskin su çatışmazlığı mövcuddur. Başqa bir məlumata əsasən, ölkə ərazisinin dörddə üçündə susuzluqla əlaqədar gərginlik yaşanır. Ən kritik durum paytaxt Tehranda və onun ətrafında müşahidə olunur və burada "qırmızı vəziyyət"in hökm sürdüyü bildirilir. İran Energetika Nazirliyi də su təchizatı ilə bağlı ən böyük gərginliyin 20 milyon insanın yaşadığı Tehran və Əlborz bölgəsində mövcud olduğunu açıqlayıb.
Nazirliyin bildirdiyinə görə, hazırda Tehran və ətrafını su ilə təmin edən beş su anbarında adi halda olduğundan 511 milyon kubmetr az su vardır. Onlardan birinin - Kərəc su bəndinin vəziyyəti ilə bağlı sosial şəbəkələrdə yayılan görüntülər ciddi narahatlıq doğurub və bölgə sakinlərini çox çətin bir yayın gözlədiyini üzə çıxarıb. Ölkə prezidenti Məsud Pezeşkian vəziyyətin deyildiyindən daha pis olduğunu bildirib, həmçinin su ehtiyatlarının idarə olunmasının mövcud metodlarının artıq işə yaramadığını söyləyərək, əsas problemin, İran cəmiyyətinin düşündüyü kimi, idarəetmədə olduğunu vurğulayıb. İyulun 20-də isə İran prezidenti hökumət üzvlərinin və mütəxəssislərin iştirakı ilə su çatışmazlığının həlli yollarına dair xüsusi müşavirə keçirib".
