İspaniyanın muxtar icması olan Kataloniyada baş verən kəskin hava şəraiti nəticəsində təcili tibbi yardım xidmətinin əməkdaşları 30 nəfərə lazımi tibbi yardım göstəriblər.
Oxu.Az-ın "La Sexta" telekanalına istinadən verdiyi məlumata görə, xəsarət alan şəxslərdən dördü xəstəxanalara yerləşdirilib. Lakin zərərçəkənlərin heç birində həyat üçün təhlükə yaradan ciddi travmalar aşkarlanmayıb.
Telekanalın yaydığı məlumata əsasən, xilasetmə briqadaları şiddətli yağış və dolunun yaratdığı fəsadları aradan qaldırmaq məqsədilə 500-ə yaxın çağırış ünvanına cəlb olunublar.
Baş vermiş təbii fəlakətin ən çox ziyan vurduğu yerlərdən biri də Tarraqona şəhəridir. Sözügedən ərazidə aramsız yağan yağışlar nəticəsində ağaclar aşıb, çoxlu sayda vətəndaş işıqsız vəziyyətdə qalıb. Şəhərin bir sıra hissələri isə bütövlükdə su altında qalıb.
