Los-Ancelesin bəzi rayonlarında davam edən etirazlar səbəbindən komendant saatı tətbiq edilib.
Oxu.Az xəbər verir ki, bu barədə Los-Ancelesin meri Karen Bass özünün "X" səhifəsində məlumat verib.
K.Bass şəhər sakinlərini mərkəzi hissədən uzaq durmağa çağırıb və xəbərdarlıq edib ki, komendant saatını pozan şəxslər saxlanılacaq və məsuliyyətə cəlb olunacaqlar.
"Əgər Los-Ancelesin mərkəzində yaşamırsınızsa və ya işləmirsinizsə, lütfən, ərazidən uzaqlaşın. Hüquq-mühafizə orqanları komendant saatını pozan hər kəsi həbs edəcək", - Karen Bass vurğulayıb.
Mer etirazlar nəticəsində şəhərə ciddi ziyan dəydiyini də açıqlayıb.
Qeyd edək ki, Los-Ancelesdəki qanunsuz mühacirlərə qarşı polis basqınlarından sonra şəhərdə iğtişaşlar baş verib.
