"LUKOIL"un səhmlərinin qiyməti Moskva birjasında noyabrın 13-də son iki ilin ən minimum həddinə enib. Bakı vaxtı ilə saat 12:11-də bir aksiyanın qiyməti 4837.5 rublə (təxminən 102 manat) qədər düşüb.
Oxu.Az xəbər verir ki, bu barədə gazeta.ru məlumat yayıb.
Daha əvvəl, noyabrın 12-də, şirkətin qiymətli kağızları sessiya ərzində nəzərəçarpacaq dərəcədə ucuzlaşırdı. Qeyd olunur ki, son dəfə "LUKOIL"un səhmləri 2023-cü il iyunun 26-da 5 000 rubl səviyyəsindən aşağı olub.
Məlumata görə, neft şirkətinin səhmlərinə təzyiq sanksiyalar səbəbindən davam edir.
Xatırladaq ki, oktyabrın 22-də ABŞ "Rosneft", "LUKOIL" və onların 34 törəmə şirkətinə qarşı məhdudiyyətləri genişləndirib. Məhdudiyyətlər bu şirkətlərin ABŞ yurisdiksiyasında olan və ya amerikalıların nəzarəti altında olan bütün aktivlərinin, əmlak hüquqlarının bloklanmasını, həmçinin onlar haqqında OFAC-yə (ABŞ Maliyyə Nazirliyinin maliyyə kəşfiyyatı, iqtisadi və ticarət sanksiyalarının planlaşdırılması və tətbiqi ilə məşğul olan bölməsi) məcburi hesabat verilməsini nəzərdə tutur.
