Fransa Prezidenti Emmanuel Makron Fransua Bayru hökumətinin istefa təhlükəsi və aşağı reytinqi fonunda, vaxtından əvvəl istefa verməyəcəyini bildirib.
Oxu.Az "Le Figaro"ya istinadən xəbər verir ki, Makron bu barədə Almaniya kansleri Fridrix Mertslə birgə keçirdiyi mətbuat konfransında danışıb.
Jurnalistlər ondan 2026-cı il büdcəsinin qəbulu ilə bağlı yaranan çətinliklər və sentyabrın 8-nə etimad səsverməsi təyin edilən Bayru hökumətinin gələcək perspektivləri barədə münasibətini soruşublar.
Makron bildirib ki, büdcə məsələsində hökumətlə parlament arasında razılığa nail olunacağına ümid edir.
"Mənə gəlincə, mən demokratiyaya inanıram və düşünürəm ki, insanlar mandata səs verirlər. Xalq məni sona qədər yerinə yetirmək niyyətində olduğum mandat üçün seçib", - deyə Fransa prezidenti vurğulayıb.
