Mərmərə dənizində nadir görüntülər: Yetkin delfin bala delfini vuraraq öldürdü

Türkiyədə Kınalıada (Mərmərə dənizindəki dörd böyük adadan ən kiçiyi - red.) sahillərində yetkin delfin bala delfini dəfələrlə vuraraq öldürüb.

Bu barədə Oxu.Az Türkiyə KİV-ə istinadən xəbər verir.

Həmin anlar cib telefonu kamerası ilə lentə alınıb.

Elm adamları "Infanticide" ("Körpə qətli") olaraq xarakterizə edilən bu davranışın dünyada dəniz məməlilərində nadir hallarda lentə alındığını bildiriblər və bununla bağlı məqalə dərc ediblər.

Türkiyəli mütəxəssis, İstanbul Universiteti Su Elmləri Fakültəsinin müəllimi və Türkiyə Dəniz Araşdırmaları Vəqfinin (TÜDAV) vitse-prezidenti, dosent Mehmet Arda Tonay hadisə ilə bağlı açıqlama verib.

Onun sözlərinə görə, görüntülər keçən avqust ayında Kınalıada sahillərində dalğıc Fibay Qorxmaz tərəfindən lentə alınıb. Mütəxəssis qeyd edib ki, bu ərazi dəniz məməliləri baxımından əhəmiyyətli bölgədir və Mərmərə dənizində bir çox növü yaşayır.

Mehmet Arda Tonay vurğulayıb ki, qeydə alınan görüntü dünyada əldə edilən nadir kadrlardandır.

"53 saniyədir, çox qısa olmasına baxmayaraq, dünyada çox az sayda olan nadir qeyddir, çox az müşahidə olunan görüntüdür. "Infanticide" ("Körpə qətli") heyvanlarda müşahidə olunan davranışdır. Əsasən balıqlarda, amfibiyalarda (suda-quruda yaşayanlar), quşlarda və primatlarda, şirlər və ayılar kimi məməlilərdə müşahidə edilir. Dəniz məməlilərində də qeydə alınır, amma dediyim kimi, dünyada bunun videogörüntüləri olduqca azdır", - deyə o bildirib.

Hadisənin səbəbləri ilə bağlı da danışan mütəxəssis "Niyə bunu edirlər?", "Niyə balanı öldürürlər?" suallarını da cavablandırıb.

"Daha çox erkək heyvanların etdiyi ehtimal edilir. Məqsəd isə balanı öldürərək onun anası ilə cütləşməkdir. Çünki süd verən dişi başqa erkək heyvanla cütləşmir. Öz törəmə uğurunu artırmaq üçün bu davranışı sərgilədiyini düşünürük", - deyə o qeyd edib.

"Bu qeydlər heyvanların həm biologiyası, həm davranışları, həm törəmə strategiyaları, həm də sosial quruluşları ilə bağlı bizə unikal məlumatlar əldə etməyə imkan verir", - deyə Mehmet Arda Tonay vurğulayıb.