Gecə və səhər saatlarında Moskva və Moskva vilayəti istiqamətində yüzlərlə pilotsuz uçuş aparatı (PUA) buraxılıb, paytaxt ətrafının bir neçə bölgəsində zərbələr nəticəsində yanğınlar başlayıb.
Oxu.Az xəbər verir ki, bu barədə "Unian" məlumat yayıb.
Moskvanın meri Sergey Sobyaninin sözlərinə görə, axşam saat 20:30-dan səhər 06:30-dək Moskva regionu istiqamətində 390-dan çox dron uçub. O, paytaxta yaxınlaşarkən 81 PUA-nın məhv edildiyini iddia edib.
Eyni zamanda, "Exilenova+" "Telegram" kanalı məlumat verir ki, Moskva ətrafındakı Çexov şəhərində yerləşən "Gidrostalkonstruksiya" zavodu hücuma məruz qalıb. İlkin məlumatlara əsasən, dron müəssisənin ərazisindəki boruya çırpılıb.
Zavodun əsas fəaliyyət istiqaməti energetika və su təsərrüfatı obyektləri üçün hidromexaniki avadanlıqların, metal konstruksiyaların və digər məmulatların istehsalıdır.
Bununla yanaşı, "Astra" nəşri "Gidrostalkonstruksiya"dan bir kilometrdən az məsafədə yerləşən Çexov regenerat zavodunun ərazisində yanğın baş verdiyini yazır. Bu müəssisə köhnə avtomobil şinlərinin təkrar emalı, şin regeneratı, rezin qırıntıları, rezin tozu və müxtəlif rezin-texniki məmulatların istehsalı üzrə ixtisaslaşıb. Müəssisənin öz məlumatına görə, o bu sahədə Rusiyanın ən iri istehsalçılarından biridir.
Bundan əlavə, yerli sakinlər Podolsk və Koledino ərazilərindəki yanğınları əks etdirən kadrları paylaşırlar. Həmin ərazilərdə "Wildberries" şirkətinin anbarları yerləşir, lakin konkret olaraq nəyin yandığı hələlik dəqiq bilinmir. "Telegram" kanallarının ehtimalına görə, Koledinoda "Wildberries"in yaxınlığında yerləşən 3PL (Third Party Logistics) anbarı yana bilər.
