Rusiya XİN: "Fransa söz azadlığını kobud şəkildə pozur və Rumıniyanın daxili işlərinə qarışır"

Rusiya Xarici İşlər Nazirliyinin sözçüsü Mariya Zaxarova "Telegram"ın həmtəsisçisi Pavel Durovun Fransa Xarici Kəşfiyyatının Baş İdarəsinin rəhbəri Nikolya Lernerin Rumıniyada keçirilən seçkiyə təsir etmək istəyi ilə bağlı açıqlamasına cavab verib.

Oxu.Az xəbər verir ki, bu barədə TASS məlumat verib.

Zaxarovanın sözlərinə görə, söhbət Fransanın bu ölkənin daxili işlərinə qarışmasından gedir.

Bundan əvvəl Durov "X" hesabında məlumat vermişdi ki, bu yaz Lerner ondan seçki ərəfəsində rumın mühafizəkarlarını susdurmağı xahiş edib, lakin ona rədd cavabı verilib.

"Bu, artıq təkcə Fransada söz azadlığının və insan haqlarının kobud şəkildə tapdalanması deyil. Bu ittiham daha ciddidir: söhbət suveren dövlətin daxili işlərinə birbaşa müdaxilədən və fundamental demokratik mexanizmin - seçkinin manipulyasiyasından gedir", - diplomat bildirib.

Xatırladaq ki, mayın 18-də Rumıniyada keçirilən seçkidə müstəqil namizəd Nikuşor Dan qalib gəlib.