Moskvanın "Spartak" komandasının heyətində Rusiya Kubokunun qalibi olan Nikolay Rasskazov və "Dinamo Moskva" komandasında RF Premyer Liqasının ikiqat bürünc medalçısı Dmitri Skopintsev Ukraynanın "Mirotvorets" bazasına daxil ediliblər.
Oxu.Az-ın xəbərinə görə, bunu resursun veb saytındakı məlumatlar təsdiqləyir.
Həmçinin aralarında Vladimir Xubulov, Maksim Vityuqov, Roman Yevgenyev və Sergey Babkinin olduğu Samaranın "Krılya Sovetov" komandasından da bir neçə futbolçu bazaya daxil edilib. Onlar "Ukraynanın suverenliyinə və ərazi bütövlüyünə qəsd etməkdə", eləcə də xüsusi hərbi əməliyyatı dəstəkləməkdə ittiham olunurlar. Bu şəxslərin bazaya əlavə edilməsinə səbəb idmançıların "Rusiya - idman gücü" forumunda iştirakları olub.
Habelə rusiyalı basketbolçular Yekaterina Fedorenkova, İnna Fastova və Yuliya Poluyanova da oxşar səbəblərdən bazaya əlavə ediliblər.
Qeyd edək ki, 2014-cü ildən tərtib olunan "Mirotvorets" portalı Ukraynanın milli təhlükəsizliyini təhdid etdiyi iddia olunan insanlar haqqında məlumatları dərc edir.
