Yekaterinburqdakı cinayət işi üzrə azərbaycanlıların saxlanılmasından sonra "Kaspiy" kafesi və "Baku Plaza" ticarət mərkəzi bağlanıb. Lakin bu gün ticarət mərkəzi yenidən güc strukturlarının əməkdaşlarının diqqətini cəlb edib.
Oxu.Az -ın E1.ru-ya istinadən verdiyi xəbərə görə, hazırda mərkəzin yaxınlığında səssizlik hökm sürür, lakin müxbirlər orada əvvəlcə Rusiya Milli Qvardiyasının dəstəsini görüblər, daha sonra isə polis yaxınlaşıb.
Məlum olub ki, güc strukturlarının əməkdaşları ticarət mərkəzinin yaxınlığında çəkiliş aparan "Krik TV" telekanalının çəkiliş qrupu ilə münaqişəyə dair məlumat əsasında basqın ediblər.
Jurnalistlər iddia edirlər ki, mərkəzin mühafizəçisi telekanalın əməkdaşlarından birinə hücum edib.
"Həyəcan siqnalı düyməsini basmağa səbəb ziyarətçilərlə bu ticarət mərkəzinin işçiləri arasında yaranmış münaqişə olub, işçilər gələnə kimi bu münaqişə həll olunub", - deyə Rusiya Milli Qvardiyasından izah ediblər.
Qeyd olunub ki, ticarət mərkəzinin icarəyə verdiyi məkanlar da işləmir, açılış tarixi ilə bağlı məlumat yoxdur.
"Kaspiy" kafesi iyunun 27-dən işləmir. Həmin gün güc strukturlarının əməkdaşları obeyktə gələrək onun sahibi Azər Səfərovu saxlayıblar. O, 24 il əvvəl baş vermiş qətldə şübhəli bilinir.
Hazırda "Kaspiy" kafesinin girişində "Kafe işləmir. Sanitariya işləri gedir" yazısı asılıb. Halbuki içərisi boşdur, heç bir təmizlik və təmir işləri aparılmır.
Bundan əlavə, məlum olub ki, Yekaterinburqda saxlanılan azərbaycanlılar onlarla insanın spirtli içkidən kütləvi zəhərlənməsində iştirakda şübhəli bilinirlər. Bu barədə RBC nəşri məlumatı hüquq-mühafizə orqanlarındakı mənbəyə istinadən yayıb.
Mənbə bildirib ki, hadisə nəticəsində 2021-ci ildə Orenburq vilayətində onlarla insan həlak olub.
2021-ci ilin oktyabr ayının əvvəlində Orenburq vilayətində 64 nəfər saxta spirtlə zəhərlənərək xəstəxanalara müraciət edib, 35 nəfər ölüb. Daha sonra müstəntiqlər və polis iki anbar və bir istehsal nöqtəsi aşkar edərək, təxminən 3000 litr spirt tərkibli maye ələ keçirib. Bildirilib ki, 17 nəfər saxlanılıb, onlardan 15-i həbs edilib, 1 nəfər ev dustaqlığındadır, 1 nəfər barəsində isə inzibati həbs tədbiri seçilib.
