İsrail Müdafiə Ordusunun (SAXAL) Suriya ərazisində İranla əlaqəli olduğu iddia edilən yaraqlıların saxlanılması ilə bağlı yaydığı məlumatlar əsassızdır.
Oxu.Az xəbər verir ki, bu barədə Suriya XİN-in rəsmi nümayəndəsi Kütəybə İdlibi "Al Arabiya" telekanalına müsahibəsində danışıb.
"Bizim əlimizdə bu cür fəaliyyətlərlə bağlı konkret kəşfiyyat məlumatları yoxdur", - deyə İdlibi Suriya ərazisində İranyönümlü qruplaşmaların mövcudluğu ilə bağlı suala cavabında bildirib.
Diplomat həmçinin qeyd edib ki, bu kimi potensial təhlükələrin qiymətləndirilməsi və Suriyanın suverenliyinin pozulmasının qarşısının alınması üçün beynəlxalq əməkdaşlıq, həmçinin yeni hökumətlə dialoq xüsusi əhəmiyyət daşıyır.
İsrail Müdafiə Ordusu (SAXAL) Suriyada bir neçə silahlı radikal şəxsi saxlayıb.
Oxu.Az xəbər verir ki, bu barədə SAXAL-ın Mətbuat Xidməti məlumat yayıb.
Bildirilir ki, saxlanılan şəxslərin İran Silahlı Qüvvələrinin elit birləşməsi olan "Əl-Qüds" Xüsusi Təyinatlı Qüvvələri ilə əlaqəsi var.
"Kəşfiyyat məlumatlarına əsasən, Tel-Kudna bölgəsində İranın "Əl-Qüds" qüvvələrinin rəhbərliyi altında fəaliyyət göstərən dəstə gecə saatlarında keçirilən əməliyyat nəticəsində saxlanılıb", - deyə açıqlamada bildirilir.
SAXAL əlavə edib ki, İsrail əhalisinin təhlükəsizliyini təmin etmək məqsədilə Suriyada hər hansı terror təşkilatının möhkəmlənməsinin qarşısını almaq istiqamətində əməliyyatlar davam etdirilir.
