Səudiyyə Ərəbistanı əsas neft markasının qiymətində son 26 ilin ən böyük endirimini elan edib: avqust ayında Asiya bazarı üçün "Arab Light" markalı neftin bir barelinin qiyməti 11 dollar müəyyən edilib.
Oxu.Az xəbər verir ki, bu barədə "Bloomberg" agentliyi Səudiyyə Ərəbistanının dövlət şirkəti "Saudi Aramco"nun qiymət siyahısına istinadən xəbər yayıb.
Müəyyən edilmiş qiymət regional bençmarka (istiqamətverici qiymətə) nisbətdə 1.5 dollar endirim nəzərdə tutur. Bu, "Bloomberg" analitiklərinin proqnozlaşdırdığı 8 dollarlıq endirimdən daha əhəmiyyətlidir.
Ekspertlər qeyd edir ki, regionda hasil edilən neftin ucuzlaşması təchizat bolluğu ilə bağlıdır. "Saudi Aramco" şirkəti Fars körfəzində yerləşən Ras-Tannura limanı vasitəsilə ixrac əməliyyatlarını bərpa etdikdən sonra xammal nəqlini hərbi gərginlikdən əvvəlki dövrlə müqayisədə təqribən 90 faizə çatdırıb.
Xatırladaq ki, neftin qiyməti iyun ayından etibarən, ABŞ və İran arasında hərbi fəaliyyətlərin dayandırılması və Hörmüz boğazının açılması ilə bağlı razılaşma fonunda enməyə başlayıb. Həmin dövrdən bəri "Brent" markalı neftin bir barelinin dəyəri 71 dollardan aşağı düşərək, fevralın sonundakı səviyyəyə qayıdıb.
