İranın Tehran əyalətində yerləşən Nəsirabad sənaye şəhərciyindəki istehsalat obyektində güclü yanğın baş verib.
Oxu.Az "Fars" agentliyinə istinadən xəbər verir ki, bu barədə Tehran əyalətinin təcili tibbi yardım xidmətinin nümayəndələri məlumat veriblər.
Hadisə alışqan və alışqanlar üçün qaz istehsal edən müəssisədə qeydə alınıb. Yanğın nəticəsində bir nəfər həlak olub, daha beş nəfər isə xəsarət alıb. Yaralıların hamısı xəstəxanaya çatdırılıb.
Tehran Təcili Tibbi Yardım Xidmətinin nümayəndəsi Şervin Təbrizinin sözlərinə görə, yanğın barədə məlumat yerli vaxtla saat 07:20-də (Bakı vaxtı ilə 07:50 - red.) daxil olub. Hadisə yerinə təcili tibbi yardım briqadaları və xüsusi nəqliyyat vasitələri cəlb edilib.
Yanğının başvermə səbəbi barədə hələlik məlumat verilməyib.
