Avstriyada yüngülmühərrikli təyyarə havada paraplançı qadınla toqquşub, lakin o, möcüzə nəticəsində sağ qalaraq yerə enə bilib.
Oxu.Az xəbər verir ki, hadisənin təfərrüatını "Kronen Zeitung" nəşri yayıb.
44 yaşlı idmançı Şmittenhöe təpəsindən havaya qalxaraq Pintsqau vadisi üzərində uçuş həyata keçirirmiş. Bu zaman Tirol bölgəsindən olan 28 yaşlı pilotun idarə etdiyi "Cessna" markalı təyyarə onunla toqquşub.
Təyyarənin pəri paraplanın qübbəsini demək olar ki, tamamilə parçalayıb.
Qadın böyük çətinliklə ehtiyat paraşütünü açaraq ölümdən xilas ola bilib. O, yalnız yüngül xəsarətlər alıb.
Təyyarə isə Zell-am-Zee hava limanına uğurla eniş edib.
Hadisə paraplançının sinəsinə bərkidilmiş kamera tərəfindən qeydə alınıb. Xilasedicilər baş verənləri inanılmaz şans adlandırıblar.
Toqquşmanın səbəbləri araşdırılır.
