Yaponiyanın "Honda Motor" şirkəti Kanadadan istehsalı köçürmək planlaşdırdığı barədə mediada yayılan iddialara cavab verib.
Oxu.Az-ın verdiyi məlumata görə, bu barədə şirkətin yerli bölməsi bəyanat yayıb.
"Ellistondakı (Ontario əyaləti) "Honda" zavodu yaxın gələcəkdə tam gücü ilə işləyəcək və hazırda heç bir dəyişiklik planlaşdırılmı", - deyə bəyanda vurğulanıb.
Kanadanın İnnovasiya, Elm və Sənaye naziri Anita Anand da "X"dəki səhifəsində istehsalın köçürülməsi barədə məlumatları təkzib edib.
Məmurun yazdığına görə, o, "Honda"nın Kanada bölməsinin baş direktoru Deyvid Ceymison ilə məhsuldar görüş keçirib və görüş zamanı o, şirkətin istehsalı başqa ölkələrə köçürmək planlarının olmadığını təsdiqləyib.
"Honda Motor" şirkəti ABŞ Prezidenti Donald Trampın Administrasiyasının tətbiq etdiyi 25% gömrük rüsumları səbəbindən avtomobil və ehtiyat hissələrinin istehsalını Kanada və Meksikadan ABŞ-yə köçürməyi planlaşdırır.
Oxu.Az-ın məlumatına görə, bu barədə "Nikkei" qəzeti xəbər verib.
Qeyd olunur ki, şirkət ABŞ-də təxminən 1.42 milyon avtomobil satır ki, bu da onun dünya satışlarının təxminən 40%-ni təşkil edir. Bu zaman təxminən bir milyon maşın yerində istehsal olunur, təxminən 500 min avtomobil isə idxal edilir (əsasən Kanadadan).
Yaponiyanın avtomobil şirkətləri əvvəllər ABŞ, Meksika və Kanada arasında bir sıra şərtlərə əməl olunduğu təqdirdə sıfır rüsum təmin edən xüsusi sazişdən istifadə edirdilər. Bunun sayəsində şirkətlər işçi qüvvəsinin daha ucuz olduğu Kanada və Meksikada ixrac bazası yaradırdılar.
Lakin Trampın rüsum tətbiq etmək qərarından sonra "Honda" ABŞ ərazisində avtomobil istehsalını 30% artırmaq niyyətindədir.
Nəticədə ABŞ-də satılan bu markanın avtomobillərinin 90%-i Birləşmiş Ştatlarda istehsal ediləcək.
Beləliklə, "CR-V" yolsuzluq avtomobili və "Civic" sedan modelinin istehsalı Kanadadan ABŞ-yə, "HR-V" modelinin istehsalı isə Meksikadan ABŞ-yə köçürüləcək. Prosesin azı iki il çəkəcəyi gözlənilir.
