Tramp Kaliforniyada meşə yanğınlarının vurduğu ziyanı nüvə zərbəsi ilə müqayisə etdi

"ABŞ-nin Kaliforniya ştatının Los-Anceles dairəsində baş verən meşə yanğınlarının miqyası nüvə zərbəsinin vurduğu ziyanı üstələyir".

Oxu.Az-ın xəbərinə görə, bu sözləri ABŞ-nin yeni seçilmiş prezidenti Donald Tramp "Newsmax" telekanalına müsahibəsində deyib.

"Vəziyyət televiziyada gördüyünüzdən daha pisdir. Hesab edirəm ki, oradakı dağıntılar nüvə zərbəsinin verəcəyi dağıntılardan daha böyükdür", - deyə o qeyd edib.

Tramp, həmçinin, ölənlərin sayının əhəmiyyətli dərəcədə artacağını da güman edir.

Xatırladaq ki, yanvarın 7-də Los-Anceles dairəsində meşə yanğınları sürətlə yayılmasına, meteoroloqların sözlərinə görə, quru və çox küləkli hava səbəb olub. Yanğınların ümumi sahəsi 16 min hektarı ötüb. Alov 12 300-dən çox tikilini, o cümlədən məşhurların prestijli rayonlarda yerləşən mülklərini məhv edib. Baydenin oğlu Hanter, aktrisa və model Peris Hilton, aktyor və rejissor Mel Gibsonun evləri yanıb. Son məlumatlara görə, 24 nəfər ölüb.