"ABŞ-nin İranla hərbi əməliyyatları davam etdirməsi iqtisadi fəlakətlə nəticələnə bilər".
Oxu.Az TASS-a istinadən xəbər verir ki, bunu ABŞ Prezidenti Donald Tramp Fransnın Evian şəhərində keçirilən "Böyük Yeddilik" (G7) sammitindəki iştirakının yekunlarına dair təşkil olunmuş mətbuat konfransında etiraf edib.
"Mən bir şeyi görmək istəmirdim - iqtisadi fəlakət. Əgər müharibəyə davam etsəydik, belə bir şey baş verə bilərdi", - deyə o, İran və ABŞ arasında münaqişənin başa çatdırılmasına dair razılaşmaların əldə olunmasını şərh edərkən bildirib.
Amerikalı lider, həmçinin ABŞ-ni İrana qarşı hərbi əməliyyatları davam etdirməyə çağıranları axmaq hesab edir. Bundan əlavə, ABŞ Tehranın Vaşinqtonla əldə olunmuş razılaşmaları yerinə yetirdikcə İrana qarşı birtərəfli sanksiyaları tədricən ləğv etmək niyyətindədir.
"Hazırda elə sanksiyalarımız qüvvədədir ki, onlar heç vaxt özlərini bərpa edə bilməzlər. Onların pulları olmazdı, yoxsulluq içində yaşayardılar, aclıqdan 91 milyon insan məhv olardı. Ona görə də, onlar özlərini yaxşı aparmağa başlayan kimi nəsə baş verəcək. Özlərini yaxşı aparanda biz sanksiyaları ləğv edəcəyik. ", - deyə ABŞ prezidenti İrana qarşı Amerika məhdudiyyətlərini şərh edərkən bəyan edib.
Sənədin təntənəli imzalama mərasiminin iyunun 19-da İsveçrədə keçirilməsi planlaşdırılır.
