ABŞ tərəfindən təqdim edilmiş sülh planında ən azı üç bənd var ki, bunlar Ukrayna üçün qırmızı xətt hesab olunur və danışıqların irəliləməsinə mane ola bilər.
Oxu.Az xəbər verir ki, bu barədə CNN yüksəkrütbəli Kiyev rəsmisinə istinadla yazıb.
Mənbəyə görə, söhbət İlk növbədə Donbas ərazilərinin, o cümlədən Ukraynanın "istehkamlar zolağı" adlanan ərazilərinin verilməsi ilə bağlı həssas məsələdən gedir. Digər bənd Ukrayna Silahlı Qüvvələrinin sayının məhdudlaşdırılması ilə bağlı mübahisəli təklifdir.
Ukraynanın NATO-ya üzvlükdən imtina etməsi tələbi də qəbuledilməzdir. Bu güzəşt pis presedent yaradacaq və Rusiyanın əlinə hərbi bloka qarşı veto hüququ verəcək.
CNN-in yazdığına görə, müzakirə olunan bu üç bənd Ukrayna üçün həssas və çoxdankı qırmızı xətlərdir. Bunların hər birindən hər hansı şəkildə geri çəkilmək ciddi məsələdir və bunu etməyə çalışan Ukrayna liderlərinə potensial böyük risklər yarada bilər.
Daha əvvəl ABŞ Prezidenti Donald Tramp bəyan edib ki, Rusiya Ukrayna ilə bağlı danışıqlarda "güzəştə gedir" və döyüş əməliyyatlarının dayandırılmasını və böyük ərazilərdə nəzarəti itirməyi müzakirə etməyə hazırdır. O bildirib ki, onun xüsusi nümayəndəsi Stiven Uitkoff gələn həftə Rusiya Prezidenti Vladimir Putinlə görüşəcək.
