Venesuelanın Barinas ştatında cəzaçəkmə müəssisəsinin ərazisi məhbuslar tərəfindən nəzarətə götürülüb.
Oxu.Az xəbər verir ki, bu barədə qeyri-hökumət təşkilatı olan Həbsxanalara Nəzarət Mərkəzi (Observatorio Venezolano de Prisiones) özünün "X" sosial şəbəkəsindəki hesabında məlumat paylaşıb.
Səhər saatlarında dövlət himni səsləndirildikdən dərhal sonra INJUBA həbsxanasında 1300-dən artıq məhkum, o cümlədən qadın məhbuslar nümayişə başlayıblar. Etirazçıların bir qismi həbsxana qüllələrinin damına çıxaraq orada döşəkləri yandırıblar.
Hüquq müdafiəçilərinin verdiyi məlumata əsasən, mühafizə xidməti etirazçılara qarşı odlu silahdan istifadə edib. Məhbusların yaxınları Milli Qvardiya qüvvələrinin həbsxana ərazisinə daxil olmasının qarşısını almağa cəhd etsələr də, buna nail ola bilməyiblər. Ardınca müəssisənin daxilindən atəş və partlayış səsləri eşidilib, ətrafı gözyaşardıcı qaz dumanı bürüyüb.
İğtişaşlar əsas səbəb kimi həbsxananın yeni rəhbərliyinin həddindən artıq sərt daxili intizam qaydaları tətbiq etməsi göstərilir.
