Xarkov şəhəri növbəti dəfə Rusiya ordusunun hədəfinə çevrilib.
Sumı vilayətində bufer zona yaratmağa çalışan Rusiya ordusunun Xarkovla bağlı planları da eynidir. Xarkov şəhərinin meri İqor Terexov və Ukrayna Silahlı Qüvvələrinin Xarkov vilayəti üzrə rəsmisi Pavlo Şamşin Baku TV-nin Şərqi Avropa bürosuna son hücumlar və itkilər barədə məlumat veriblər.
İqor Terexovun sözlərinə görə, hücumların intensivliyi dəyişkəndir:
"Hər gün partlayışlar baş verir, dağıntılar qeydə alınır. Təxminən 10 milyon dollar maddi ziyan dəyib. Dağılan binaları bərpa etmək mümkündür, amma həyatını itirən insanları geri qaytarmaq mümkün deyil. Son 3 ildə Xarkovda 12 mindən çox mülki obyekt dağıdılıb və ya zədələnib. Bunların 9500-ü yaşayış binalarıdır. Şəhərin 160 min sakini mənzillərini, evlərini itirib".
Ukrayna Silahlı Qüvvələrinin rəsmisi Pavlo Şamşin bildirib ki, Xarkov vilayətində ən gərgin vəziyyət Volçansk və ətraf ərazilərdə müşahidə olunur:
"Rusiya bu istiqamətdə hərbi əməliyyatları genişləndirir. Hərbçilərimizi Volçya çayının cənub sahilinə sıxışdırmağa çalışırlar, lakin buna nail ola bilmirlər. Bu səbəbdən Volçanska cinahlardan yaxınlaşmaq cəhdləri edilir. Dvureçnaya qəsəbəsində də vəziyyət mürəkkəb olaraq qalır. Rusiya hərbçilərini Oskol çayının qərb sahilinə köçürməyə davam edir. Məqsəd sağ sahildən Kupyansk şəhərinə təzyiq göstərmək və onu mühasirəyə almaqdır".
Onun sözlərinə görə, Rusiya Ordusu hazırda kiçik qruplaşmalarla hücum edir və bu taktika ilə Ukrayna mövqelərinə gizli şəkildə soxulmağa çalışır:
"Əvvəllər hücumlarda əsasən artilleriyadan istifadə olunurdusa, indi dronlara üstünlük verilir. Tamamilə müxtəlif tipli dronlardan istifadə olunur. 2022, 2023 və 2024-cü illərin eyni dövrləri ilə müqayisədə bu il dronlar cəbhənin əsas təhlükəsi halına gəlib".
İqor Terexov əlavə edib ki, Xarkov şəhərinin təcili şəkildə Hava Hücumundan Müdafiə sistemlərinə ehtiyacı var.
Ətraflı süjetdə:
