Rəsmi Tokio Rusiya Prezidenti Vladimir Putinin Cənubi Kuril adalarına gəlişinə cavab olaraq müxtəlif reaksiyalar və addımlar üzərində işləyir.
Oxu.Az xəbər verir ki, bu barədə Yaponiyanın İctimai Televiziyası məlumat yayıb.
Bildirilib ki, ehtimal edilən gedişlərdən biri kimi Ukrayna böhranı səbəbindən Yaponiyanın Rusiyaya qarşı tətbiq etdiyi sanksiyaların daha da sərtləşdirilməsi müzakirə olunur. Yapon televiziyasının təhlilinə əsasən, bu addım artıq gərginləşmiş olan Tokio və Moskva əlaqələrinin bir qədər də deqradasiyasına səbəb olacaq.
Qeyd edək ki, bir müddət əvvəl Yaponiyanın xarici işlər naziri Tosimitsu Motegi Putinin bu səfərinə görə Moskvaya kəskin etiraz edib. O, Tokionun Cənubi Kuril adaları üçün istifadə etdiyi terminologiyaya istinadla bildirib ki, İturup adası da daxil olmaqla bütün Şimal əraziləri həm hüquqi, həm də tarixi baxımdan Yaponiyanın əzəli torpaqlarıdır. Baş nazir Sanae Takaiçi də bənzər mövqedən çıxış edərək, Rusiya liderinin İturup səfərinin iki ölkə arasında əlaqələrin bərpasına mane olduğunu və Yapon xalqının qüruruna toxunduğunu qeyd edib. Öz növbəsində, rəsmi etiraz notası verilmək üçün Yaponiya Xarici İşlər Nazirliyinə çağırılan Rusiyanın bu ölkədəki səfiri Nikolay Nozdrev rəsmi Tokionun bu reaksiyasını əsassız hesab edib. Səfir yaponiyalı nazirə Cənubi Kuril adalarının Rusiyanın suveren ərazisi olduğunu bəyan edib.
