Gülər Əhmədovanın “Bank Standard”dakı 27 min dolları haqda açıqlama

Əmanətlərin Sığortalanması Fondunun (ADIF) icraçı direktoru Azad Cavadov ləğv edilmiş “Bank Standard”da sabiq deputat Gülər Əhmədovanın qarşılaşdığı problemlə bağlı açıqlama verib.

Oxu.Az xəbər verir ki, icraçı direktor Modern.az-a deyib ki, “Əmanətlərin sığortalanması haqqında” qanunun 27-ci maddəsinə əsasən, əmanətlər sığorta hadisəsi baş verdiyi günə Azərbaycan Mərkəzi Bankının (AMB) müvafiq valyutalar üzrə müəyyən etdiyi rəsmi məzənnələr əsasında hesablanmış çarpaz məzənnə üzrə hesablanır və ödənilir.

O qeyd edib ki, deyilənlər absurddur:

“Qanun var, belə şey ola bilməz. Biz hər gün nə qədər əmanətçinin əmanətini qaytarırıq. Belə problem də heç kimin başına gəlməyib. Bir tək Gülər Əhmədovanınmı başına gəldi bu?

Nəzərinizə çatdırım ki, “Bank Standard”da sığorta hadisəsi oktyabrın 4-də baş verib. Həmin gün məzənnə 1,6138 olub. Necə ola bilər ki, 0,78 məzənnəsi ilə qaytarılsın. Gülər Əhmədova özü deputat olduğu dövrdə, həmçinin Vahid Əhmədov da bu qanuna səs veriblər”.

A.Cavadov qanunu pozmağa heç kimin hüququ olmadığını vurğulayıb:

“Qanunu açıb oxumaq lazımdır, onun maddəsini kim poza bilər ki? Mən bu problem mətbuatda işıqlandırılandan sonra Vahid Əhmədovun özü ilə də danışdım. Ola bilər ki, jurnalistlər yanlış başa düşüb. Millət vəkili özü səs verdiyi qanunla bağlı belə bir şey deyə bilməz”.

Milli Məclisin İqtisadi siyasət, sənaye və sahibkarlıq komitəsinin ötən həftə keçirilən iclasında deputat Vahid Əhmədov keçmiş həmkarı Gülər Əhmədovanın problemlə qarşılaşdığını qeyd edib. 

O bildirib ki, G.Əhmədovaya ləğv edilmiş “Bank Standard”a qoyduğu 27 min dollar məbləğindəki depoziti 0,78 məzənnəsi ilə qaytarmaq istəyirlər. 

U.A.
www.oxu.az