Ağcabədidə qumbara partlaması nəticəsində həlak olanlar dəfn ediliblər

Ağcabədidə əl qumbarasının partlaması zamanı həlak olan ailə üzvləri dəfn ediliblər.

Oxu.Az Trend-ə istinadən xəbər verir ki, partlayış zamanı həyatlarını itirən Bəhruz Quliyev, Natiq Quliyev, Şamiq Quliyev ailənin yaşadığı Hindarx qəsəbə qəbiristanlığında torpağa tapşırılıblar.

Babası evinə Bərdə rayonunun Əmirli kəndindən qonaq gəlmiş Məhəmməd Məmmədli və Murad Məmmədli qardaşları isə yaşadıqları Əmirli kənd qəbiristanlığında dəfn ediliblər.

31 yanvar, 21:12

Ağcabədinin Hindarx qəsəbəsində 5 nəfərin ölümü ilə nəticələnən partlayışla bağlı yeni detallar məlum olub.

Belə ki, yaxınlarının bildirdiyinə görə, uşaqlar qumbaranı qoyun otaran zaman tapıblar.

Oxu.Az hadisə zamanı həlak olan Şamiq Quliyevin və nəvəsi Natiq Quliyevin görüntülərini əldə edib.

Ağcabədidə qumbara partlaması nəticəsində həlak olanlar dəfn ediliblər

15:08

Ağcabədidə baş vermiş partlayışla bağlı cinayət işi başlanıb.

Bu barədə Oxu.Az-a Baş Prokurorluğun Mətbuat xidmətindən məlumat verilib.

Bildirilib ki, rayonunun Hindarx qəsəbəsində baş verən parlayış nəticəsində 5 nəfər ölüb, onlardan üçü yetkinlik yaşına çatmayan şəxsdir:

1. Şamiq Əfqan oğlu Quliyev (1959);

2. Bəhruz Şamiq oğlu Quliyev (1983);

3. Məhəmməd Vidadi oğlu Məmmədli (2015);

4. Murad Vidadi oğlu Məmmədli (2018);

5. Natiq Namiq oğlu Quliyev (2018).

İki nəfər isə müxtəlif dərəcəli bədən xəsarətləri alıb:

1. Ülviyyə Şamiq qızı Quliyeva (Məmmədova) (1985);

2. Aysun Namiq qızı Quliyeva (2015).

Faktla bağlı Ağcabədi Rayon Prokurorluğunda Cinayət Məcəlləsinin 124.2-ci (ehtiyatsızlıqdan iki və ya daha çox adam öldürmə) və 228.1-ci (qanunsuz olaraq döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və ya gəzdirmə) maddələri ilə cinayət işi başlanaraq ibtidai istintaq aparılır.

14:04

"Ağcabədidə əl qumbarasının partlaması nəticəsində xəsarət alan Ülviyyə Məmmədli Bərdədən atası evinə bir neçə günlük qonaq gəlibmiş".

Bunu Oxu.Az-a açıqlamasında Ağcabədi rayonu Hindarx qəsəbəsinin icra nümayəndəsi Elgün İsmayılov deyib.

O bildirib ki, Ülviyyə Şamiq qız Məmmədlinin hər iki övladı hadisə nəticəsində həyatını itirib:

"Hadisə zamanı Ü.Məmmədlinin həyat yoldaşı Bərdə şəhərində olub. Hazırda Ülviyyə Məmmədli və onun qardaşı uşağı xəstəxanadadır. Xəstəxanada olan uşağın sözlərinə görə, əl qumbarası zibillikdən tapılıb".

Aləmdə Nəsib

13:30

"Bu gün saat 11:30 radələrində Ağcabədi rayonunun Hindarx qəsəbəsində yerləşən evlərdən birində baş verən partlayışda xəsarət alan iki nəfər Ağcabədi Rayon Mərkəzi Xəstəxanasına hospitalizasiya olunub".

Bu barədə Oxu.Az-ın sorğusuna cavab olaraq Tibbi Ərazi Bölmələrini İdarəetmə Birliyindən (TƏBİB) bildirilib.

Məlumata görə, onlardan 1985-ci il təvəllüdlü qadına aşağı ətrafın qapalı travması, 2014-cü il təvəllüdlü azyaşlı qıza isə aşağı ətrafın sıyrılmış-deşilmiş yarası diaqnozları təyin olunub.

Qeyd olunub ki, xəsarət alan şəxslərə zəruri tibbi yardım göstərilib və tibb müəssisəsinin Cərrahiyyə şöbəsində müalicələri davam etdirilir.

Hazırda hər ikisinin vəziyyəti orta ağır olaraq qiymətləndirilir.

Ağcabədidə qumbara partlaması nəticəsində həlak olanlar dəfn ediliblər

Aygün Mirakif

13:08

Ağcabədidə evdə qumbara partlayıb.

Oxu.Az "Qafqazinfo"ya istinadən xəbər verir ki, hadisə qəsəbə sakini Knyaz Məmmədova məxsus evdə baş verib.

Partlayış nəticəsində ev sahibi ilə yanaşı oğlu, iki nəvəsi və gəlini həyatını itirib. Onların üçü hadisə yerində, ikisi isə xəstəxanada vəfat edib.

Qumbaranın K.Məmmədovun nəvəsi tərəfindən zibillikdən tapılaraq evə gətirildiyi bildirilir.

12:59

Yanvarın 31-də saat 12 radələrində Ağcabədi rayonunun Hindarx qəsəbəsində yerləşən evlərdən birində beş nəfərin ölməsi, iki nəfərin yaralanması ilə nəticələnən partlayış hadisəsi baş verib.

Baş Prokurorluğun Mətbuat xidmətindən Oxu.Az-a bildirilib ki, hazırda prokurorluq əməkdaşları tərəfindən hadisə yeri müayinə olunur və digər zəruri prosessual hərəkətlər icra edilir.

Faktla bağlı Ağcabədi Rayon Prokurorluğunda araşdırma aparılır.

12:50

Ağcabədidə əl qumbarası partlaması nəticəsində ölən və yaralananların kimliyi məlum olub.

Oxu.Az "Trend"ə istinadən xəbər verir ki, hadisə zamanı Quliyeva Fatimə, Quliyev Bəhruz, Məmmədli Məhəmməd, Məmmədli Murad, Quliyev Şamil həlak olublar. Məmmədli Ülviyyə, Quliyeva Aysun, Quliyev Natiq isə yaralanıb.

Qeyd edək ki, yaralıların sayı 3-ə çatıb.

12:41

Ağcabədidə əl qumbarası partlayıb, ölən və yaralılar var.

Oxu.Az Trend-ə istinadən bildirir ki, hadisə rayonun Hindarx qəsəbəsində baş verib.

Hadisə nəticəsində beş nəfər ölüb, iki nəfər isə yaralanıblar.

Ölən və yaralananların bir ailənin üzvləri olduğu bildirilir.

Faktla bağlı araşdırma başlanıb.

Ağcabədidə qumbara partlaması nəticəsində həlak olanlar dəfn ediliblər