Nardaran qəsəbəsi ərazisində baş verən yanğında xəsarət alan olmayıb.
Bu barədə Oxu.Az-a Fövqəladə Hallar Nazirliyinin (FHN) Mətbuat xidmətindən məlumat verilib.
Qeyd olunub ki, Nazirliyin "112" qaynar telefon xəttinə paytaxtın Sabunçu rayonu, Nardaran qəsəbəsində yanğın baş verməsi barədə məlumat daxil olub.
"Məlumatla əlaqədar dərhal FHN-in Dövlət Yanğından Mühafizə Xidmətinin qüvvələri əraziyə cəlb olunub. Hadisə yerində əməliyyat şəraiti qiymətləndirilərkən yanğının vətəndaşa məxsus ümumi sahəsi 145 kvadratmetr olan və bir hissəsi qaraj kimi istifadə edilən yardımçı tikilidə baş verdiyi və yayılma riskinin yüksək olduğu müəyyən olunub.
Yanğınsöndürənlər tərəfindən həyata keçirilən zəruri və təxirəsalınmaz tədbirlər nəticəsində baş vermiş yanğın genişlənərək yaxınlıqda yerləşən digər tikililərə yayılmasına imkan verilmədən söndürülüb.
Yanğın nəticəsində tikilinin yanar konstruksiyaları və dam örtüyü 115 kvadratmetr sahədə, qarajda park edilmiş "Lİ" markalı minik avtomobilinin üzlüyü qismən yanıb, bilavasitə yaxınlıqda yerləşən digər yardımçı tikilinin dam örtüyü 3 kvadratmetr sahədə deformasiya edib. Bitişik tikililər yanğından mühafizə olunub. Xəsarət alan olmayıb", - deyə məlumatda vurğulanıb.
Bakının Sabunçu rayonu Nardaran qəsəbəsi ərazisində yanğın hadisəsi baş verib.
Oxu.Az xəbər verir ki, bununla bağlı tanınmış fotoqraf Orxan Aslanov videogörüntü yayımlayıb.
O qeyd edib ki, bu gün səhər saat 5-in yarısında Ləhiş bağları ərazidə ona məxsus qaraj yanıb.
"Maşını zədələrlə güclə çıxara bildik, amma təəssüf ki, başqa heç nəyi xilas etmək mümkün olmadı. Uzun müddət topladığım hər şey məhv oldu. Əsas odur ki, heç kim xəsarət almadı. Buna görə də yaşamaq və hər günün qədrini bilmək lazımdır. Hər şey düzələcək", - deyə O.Aslanov qeyd edib.
Əraziyə Fövqəladə Hallar Nazirliyinin yanğınsöndürən briqadası cəlb olunub.
