Cəlilabad rayonunda baş verən meşə yanğınında xəsarət alan şəxs xəstəxanadan evə buraxılıb.
Bu barədə Oxu.Az-ın sorğusuna cavab olaraq Tibbi Ərazi Bölmələrini İdarəetmə Birliyindən (TƏBİB) məlumat verilib.
Qeyd olunub ki, bu gün saat 18:00-da Respublika Təcili və Təxirəsalınmaz Tibbi Yardım Mərkəzinə Cəlilabad rayonunun Zopun kəndi ərazisindən yanğın hadisəsinin baş verməsi səbəbi ilə çağırış daxil olub.
Çağırış ünvanına təcili tibbi yardım briqadası cəlb olunub. Təcili tibbi yardım briqadası tərəfindən 1976-cı il təvəllüdlü (kişi cinsli) şəxsə zəruri tibbi xidmət göstərilib və tüstüdən zəhərlənmə diaqnozu ilə Cəlilabad Rayon Mərkəzi Xəstəxanasına təxliyə olunub.
Ona zəruri tibbi yardımlar göstərildikdən sonra vəziyyəti stabilləşib və ambulator müalicə üçün evə buraxılıb.
Cəlilabad rayonunun Zopun kəndi istiqamətində dağlıq ərazidə baş vermiş yanğın məhdudlaşdırılıb.
Oxu.Az xəbər verir ki, bu barədə Fövqəladə Hallar Nazirliyindən (FHN) məlumat verilib.
Bildirilib ki, hazırda yanğının tam söndürülməsi istiqamətində tədbirlər davam edir.
Yanğınla mübarizə tədbirlərinə FHN-in Aviasiya dəstəsinin iki ədəd helikopteri, Dövlət Yanğından Mühafizə və Xüsusi Riskli Xilasetmə xidmətlərinin qüvvələri, həmçinin Ekologiya və Təbii Sərvətlər Nazirliyinin Regional Meşə Təsərrüfatı Mərkəzi və Cəlilabad Rayon İcra Hakimiyyətinin əməkdaşları cəlb olunub.
Cəlilabad rayonunun Zopun kəndi istiqamətində dağlıq ərazidə yanğın baş verməsi barədə Fövqəladə Hallar Nazirliyinin (FHN) "112" qaynar telefon xəttinə məlumat daxil olub və dərhal əraziyə Nazirliyin qüvvələri cəlb olunub.
Oxu.Az xəbər verir ki, bu barədə FHN-dən məlumat verilib.
Bildirilib ki, yanğının daha geniş sahəyə yayılmasının qarşısını almaq və söndürülməsi işlərini sürətləndirmək məqsədilə əraziyə Aviasiya dəstəsinin iki ədəd helikopteri, Dövlət Yanğından Mühafizə Xidməti və Xüsusi Riskli Xilasetmə Xidmətinin qüvvələri cəlb olunub.
Hazırda yanğınla mübarizə tədbirləri davam edir.
Cəlilabad rayonunda yanğın davam edir.
Oxu.Az xəbər verir ki, bir nəfər tüstüdən zəhərlənib.
O, meşə təsərrüfatının əməkdaşı, 1976-ci il təvəllüdlü Qəni Nəzirovdur. Q.Nəzirov təcili tibbi yardım briqadasına təhvil verilib.
Cəlilabad rayonu Zopun kəndi istiqamətindəki meşəlik ərazidə yanğın davam edir.
Bu barədə Oxu.Az-a sakinlər məlumat veriblər.
Onların verdikləri məlumata görə, yanğın belə davam edərsə yaxınlıqda yerləşən Seyidbazar və Zopun kəndləri üçün təhlükəli vəziyyət yarana bilər. Yanğının baş verdiyi ərazinin relyefi və hava şəraitinin küləkli olması texnikanın alovu söndürülməsi üçün əlverişli hesab edilmir.
Yanğın yerinə Cəlilabaddan üç, qonşu Masallı rayonundan isə bir yanğınsöndürən maşın və şəxsi heyət cəlb olunub.
Cəlilabad rayonunda meşə yanır.
Oxu.Az xəbər verir ki, hadisə rayonun Zopun kəndi ərazisində yerləşən meşəlik sahədə başlayıb. Yanğın meşə örtüyünün sıx olduğu hissədə qeydə alınıb.
Hazırda əraziyə Fövqəladə Hallar Nazirliyinin müvafiq texnikası və canlı qüvvəsi cəlb olunub.
Yanğının başvermə səbəbləri ilə bağlı araşdırma aparılır.
