Naxçıvan Muxtar Respublikasının Kəngərli rayonunda ağır yol-nəqliyyat hadisəsi baş verib.
Fövqəladə Hallar Nazirliyindən (FHN) Oxu.Az-a verilən məlumata görə, nazirliyin "112" qaynar telefon xəttinə Yeni Kərki kəndi ərazisində yol qəzasının baş verməsi və vətəndaşların avtomobildə sıxılı vəziyyətdə qalması barədə məlumat daxil olub.
Məlumatla əlaqədar hadisə yerinə dərhal Kəngərli Rayon Yanğından Mühafizə Hissəsinin yanğınsöndürən-xilasediciləri cəlb edilib. Hadisə yerində əməliyyat şəraiti qiymətləndirilərkən "Hyundai" markalı minik avtomobilinin yoldan çıxaraq aşdığı və sərnişinlərin deformasiyaya uğramış nəqliyyat vasitəsində sıxılı vəziyyətdə qaldıqları müəyyən edilib.
Xilasedicilər xüsusi texniki vasitələrin köməyi ilə avtomobildə sıxılı vəziyyətdə qalan 1998-ci il təvəllüdlü Gülşən Məmmədbağır qızı Məmmədova, 1981-ci il təvəllüdlü Rüqəyya Məmmədbağır qızı Seyidova və 1959-cu il təvəllüdlü Telli Alı qızı Quluzadəni çıxararaq təcili tibbi yardım briqadasına təhvil veriblər.
Qəza nəticəsində avtomobildə olan digər bir sərnişin isə aldığı xəsarətlərdən hadisə yerində həyatını itirib.
Faktla bağlı müvafiq qurumlar tərəfindən araşdırma aparılır.
Kəngərli rayonunda baş verən yol-nəqliyyat hadisəsi nəticəsində 5 nəfər xəsarət alıb. Yaralılar təcili olaraq Naxçıvan Muxtar Respublika Xəstəxanasına çatdırılıblar.
Oxu.Az "Report"a istinadla xəbər verir ki, xəstəxananın növbətçi həkimi Əfruz Hüseynovanın sözlərinə görə, yaralılar Təcili Tibbi Yardım briqadaları tərəfindən tibb müəssisəsinə gətiriliblər.
Bildirilib ki, xəsarət alanlar ilkin tibbi müayinədən keçirilib və hazırda onların müalicəsi davam etdirilir. Xəstələr müvafiq şöbələrə yerləşdirilib və vəziyyətləri orta-ağır qiymətləndirilir.
Naxçıvan Muxtar Respublikasının Kəngərli rayonunda ölümlə nəticələnən ağır yol-nəqliyyat hadisəsi baş verib.
Oxu.Az "Report"a istinadla xəbər verir ki, hadisə Naxçıvan-Sədərək magistral avtomobil yolunun 22-ci kilometrliyində, Yeni Kərki kəndi ərazisindən keçən hissəsində qeydə alınıb.
Belə ki, "Hyundai" markalı minik avtomobili idarəetmədən çıxaraq aşıb. Qəza nəticəsində avtomobildə olan 2010-cu il təvəllüdlü Mirməhərrəm Afət oğlu Seyidov hadisə yerində həyatını itirib.
Qəza zamanı 1998-ci il təvəllüdlü Gülşən Məmmədbağır qızı Məmmədova, 2009-cu il təvəllüdlü Aytac Əli qızı Seyidova, 1959-cu il təvəllüdlü Telli Alı qızı Quluzadə, 1981-ci il təvəllüdlü Rüqəyyə Bağır qızı Seyidova və 2023-cü il təvəllüdlü Araz Pərviz oğlu Məmmədov müxtəlif dərəcəli bədən xəsarətləri alıblar. Yaralılar Naxçıvan Muxtar Respublika Xəstəxanasının Təcili Tibbi Yardım şöbəsinə yerləşdiriliblər.
Hadisə yerinə hüquq-mühafizə orqanlarının əməkdaşları cəlb olunub. Faktla bağlı araşdırma aparılır.
